शेतात झोपलेल्या बापाला लेकानं संपवलं, लोखंडी पाईपने डोक्यावर अन् तोंडावर वार

अजय सोनवणे, साम टीव्ही

नाशिकच्या नांदगाव तालुक्यातील जातेगाव शिवारात एक अत्यंत धक्कादायक आणि मन हेलावून टाकणारी घटना घडली असून, मुलानेच आपल्या जन्मदात्या वडिलांचा निर्घृण खून केल्याचा प्रकार उघडकीस आला आहे. दारूच्या व्यसनातून निर्माण झालेल्या कौटुंबिक वादातून ही पितृहत्येची घटना घडल्याने संपूर्ण तालुक्यात खळबळ उडाली आहे.

रविवारी रात्री च्या सुमारास विठ्ठल गायकवाड हे जेवण करून मळ्यातील खोलीत झोपण्यासाठी गेले असता रात्री 11.30 वाजताच्या सुमारास, मुलगा श्रीकृष्ण घरातून कोणालाही न कळवता मळ्यात गेला. वडील झोपेत असल्याची खात्री करून, खोलीतील लोखंडी पाईपने डोक्यावर, तोंडावर व ओठांवर जोरदार वार करत त्यांचा जागीच खून केला अशी कबुली त्याने स्वतःच दिली.

घरगुती भांडणाच्या कारणाचा राग मनात धरून मुलाने वडिलांच्या डोक्यात लोखंडी पाईप घालून खून केल्याची घटना रविवारी (दि. ४) रात्री उशिरा नांदगाव तालुक्यातील जातेगाव येथे घडली. संशयिताने वडिलांचा अज्ञाताकडून खून झाल्याचा बनाव केला. पोलिसांनी अर्ध्या तासात घटनेचा उलगडा करत संशयितास ताब्यात घेतले.

जातेगाव येथील शेतकरी विठ्ठल तुकाराम गायकवाड (५८) यांचे त्यांचा मुलगा श्रीकृष्ण ऊर्फ सावता विठ्ठल गायकवाड (२०) यांच्यात भांडण झाले होते. सावता याने रागाच्या भरात झोपलेल्या वडिलांच्या डोक्यात लोखंडी पाईपने वार केला. यात विठ्ठल गायकवाड यांचा मृत्यू झाला. सोमवारी (दि. ५) सकाळी ही घटना उघड झाली.