Crime: भयंकर! तोकडे कपडे घातल्याचा राग, भावाने ३३ वर्षांच्या बहिणीला संपवलं

Summary -

• हरियाणाच्या फतेहाबाद येथे १८ वर्षांच्या तरुणाने ३३ वर्षांच्या बहिणीची हत्या केली.

• बहिणीच्या तोकड्या कपड्यांवरून वाद झाल्यानंतर हा प्रकार घडला.

• आरोपी भावाने बॅटने बहिणीवर हल्ला करून गंभीर जखमी केले.

• रुग्णालयात उपचारादरम्यान बहिणीचा मृत्यू झाला.

बहिणीने तोकडे कपडे घातल्यामुळे भावाचा प्रचंड राग आला. या रागाच्या भरात त्याने ३३ वर्षीय बहिणीची हत्या केली. ही घटना हरियाणाच्या फतेहाबाद जिल्ह्यातील मॉडल टाऊनमध्ये घडली. भावाने केलेल्या हल्ल्यात गंभीर झालेल्या तरुणीने रुग्णालयात उपचारादरम्यान प्राण सोडले.या घटनेमुळे हरियाणामध्ये खळबळ उडाली आहे. पोलिस सध्या या प्रकरणाचा तपास करत आहेत.

१८ वर्षांच्या तरुणाला आपली बहीण तोकडे कपडे घालत असल्याचे आवडत नव्हते. तसंच त्याला बहिणीच्या चारित्र्यावर देखील संशय होता. या रागातून त्याने बहिणीवर बॅटने हल्ला केला. या हल्ल्यात गंभीर जखमी झालेल्या तरुणीला रुग्णालयात दाखल करण्यात आले. पण पुढील उपचारासाठी तिला दुसऱ्या रुग्णालयात हलवण्यात आले. तिथे उपचारादरम्यान तिचा मृत्यू झाला. या प्रकरणी पोलिसांनी आरोपी भावाला अटक केली.

पोलिसांनी सांगितले की, हत्या करण्यात आलेली राधिका ही पंजाबमधील मानसा जिल्ह्यातील झंडाकलन गावची रहिवासी होती. राधिकाने २०१६ मध्ये सिरसा येथील सुचन गावातील रहिवासी राय सिंगशी प्रेमविवाह केला होता. राधिका आणि तिचा नवरा फतेहाबादमधील मॉडेल टाउनमध्ये भाड्याच्या घरात राहत होते. राधिकाचा भाऊ हसनप्रीतने तिच्या तोकडे कपडे घालण्यावर आक्षेप घेतला आणि तिच्या चारित्र्यावर संशय घेतला.

राधिकाचा भाऊ हसनप्रीत सोमवारी तिच्या घरी आला होता. यादरम्यान दोघांमध्ये वाद झाला आणि हसनप्रीतने बहिणीच्या डोक्यावर आणि शरीरावर बॅटने हल्ला केला. या हल्ल्यात ती गंभीर जखमी झाली. राधिकाचा ओरडण्याचा आवाज ऐकून शेजारी राहणारे मदतीसाठी धावून आले. त्यांनी तात्काळ जखमी राधिकाला नजीकच्या रुग्णालयात उपचारासाठी नेले. पण प्रकृती गंभीर असल्यामुळे डॉक्टरांनी तिला अग्रोहा येथे हलवण्यास सांगितले. याठिकाणी उपचारादरम्यान तिचा मृत्यू झाला. पोलिस या प्रकरणाचा तपास करत आहेत.