Ratnagiri Crime : वडिलांनी घेतलेल्या कर्जातून त्रस्त मुलाने जन्मदात्या आईचा घेतला जीव; रक्ताच्या थारोळ्यात आईला पाहून आत्महत्येचा प्रयत्न

रत्नागिरी : रत्नागिरी शहरात आज सकाळी धक्कादायक घटना उघडकीस आली असून या घटनेने खळबळ उडाली आहे. यात मुलाने आपल्या जन्मदात्या आईच्या गळ्यावर धारदार शस्त्राने वार करून हत्या केल्याची घटना घडली आहे. इतकेच नाही तर आईला मारल्यानंतर स्वतःच्या हाताची नस कापून आत्महत्या करण्याचा प्रयत्न केला. या घटनेने परिसरात खळबळ उडाली आहे.  

रत्नागिरी शहरातील शांतीनगर परिसरात आज सकाळच्या सुमारास हि धक्कादायक घटना उघडकीस आली आहे. या घटनेत पूजा शशिकांत तेली असं मृत महीलेचे नाव आहे. तर तिचा मुलगा अनिकेत तेली याने धारदार चाकूने वार करत हत्या केली. रत्नागिरी शहराजवळ असणाऱ्या नाचणे गावातील सुपल वाडी येथे पूजा तेली आणि त्यांचा मुलगा अनिकेत राहत होते. आज सकाळी अनिकेतने अज्ञात कारणातून आईच्या गळ्यावर वार केला. तर रक्ताच्या थारोळ्यात पडलेल्या आईला पाहून अनिकेतने स्वतःच्या हाताची नस कापून घेतल्याचे पोलिसांनी सांगितले. 

रक्तबंबाळ अवस्थेत घराबाहेर येऊन बसला 

आईचा गळा कापल्यानंतर रक्तबंबाळ अवस्थेत असलेला अनिकेत घराबाहेर येऊन बसला. तेव्हा शेजाऱ्यांनी ही घटना पाहिली आणि पोलिसांना माहिती दिली. अनिकेतच्या शेजारीच त्याचे काका राहतात. घटनेची माहिती मिळताच पोलीस निरीक्षक विवेक पाटील आणि स्थानिक गुन्हे अन्वेषण शाखेची टीम तातडीने घटनास्थळी दाखल झाली आणि पंचनामा करत मृतदेह शवविच्छेदनासाठी पाठवण्यात आला आहे.

वडिलांच्या कर्जामुळे होता त्रस्त 

दरम्यान वडिलांनी घेतलेल्या कर्जामुळे त्रस्त झाल्याने यातून मुलाने भयानक कृत्य केल्याचे सांगितले जात आहे. दरम्यान अनिकेतचे वडील शशिकांत तेली यांनी सहा महिन्यांपूर्वी आत्महत्या केल्याची माहिती आहे. या नंतर अनिकेत आणि त्याची आई पूजा हे राहत होते. तर शेअर बाजारातील उलाढालीतून झालेल्या कर्जामुळे ही घटना घडली असल्याचे बोलले जात आहे.