Pune Crime: भारतीय लष्करात भरती करण्याच्या बहाण्याने तरुणांची आर्थिक फसवणूक, लुबाडले लाखो रुपये

अक्षय बडवे, साम प्रतिनिधी

भारतीय लष्कारात जाण्याचं तुमचं स्वप्न असेल आणि तुम्ही नोकरी मिळवण्यासाठी प्रयत्न करत असाल तर तुमच्यासाठी महत्त्वाची बातमी आहे. लष्कारात नोकरी करण्याचं स्वप्न असेल आणि कोणी तिला भेटून नोकरी मिळवून देण्याचं आमिष देत असेल तर सावधान. लष्करात नोकरी मिळून देण्याच्या नावाने आर्थिक फसवणूक करण्याची घटना पुण्यात घडलीय. भारतीय लष्करात भरती करण्याच्या बहाण्याने तरुणांची आर्थिक फसवणूक झाल्याची घटना घडलीय.

याप्रकरणी नांदेड जिल्ह्यातील २३ वर्षीय तरुणाने बंडगार्डन पोलीस ठाण्यात फिर्याद दिलीय. लष्कर गुप्तचर आणि बंडगार्डन पोलिसांनी याप्रकरणात करावाई करत बोगस कर्मचाऱ्याला बेड्या ठोकल्या आहेत. मिळालेल्या माहितीनुसार, नितीन बालाजी सूर्यवंशी असे या बोगस कर्मचाऱ्याचे नाव आहे. सूर्यवंशी मूळचा लातूरचा आहे, तो काही महिने लष्कर दलाच्या कॅन्टींनमध्ये कंत्राट पद्धतीने काम करत होता.

त्यावेळी झालेल्या ओळखीच्या जोरावर त्याने अनेकांची फसवणूक केली असल्याची माहिती समोर आलीय. याप्रकरणात नांदेड जिल्ह्यातील २३ वर्षीय तरुणाने बंडगार्डन पोलीस ठाण्यात फिर्याद दिलीय. नितीन सूर्यवंशीने आणखी काही तरुणांना ३ लाख रुपये दिले तर भारतीय लष्कर दलात भरती करतो, असे सांगून फसवणूक केल्याचे समोर आले आहे.

अशी झाली फसवणूक

फिर्यादी लष्कर दलाच्या भरतीसाठी पुण्यात वास्तव्यास आहे. फिर्यादी आणि सूर्यवंशी यांची ओळख उदगीर रेल्वे स्थानकावर झाली. यावेळी सूर्यवंशीने फिर्यादी यांना सदर्न कमांड कॅन्टींन आणि सब एरिया कॅन्टींन येथे भेटायला बोलावले. सूर्यवंशी तेव्हा विश्वास संपादन करण्यासाठी लष्कर दलाच्या गणवेशात भेटायला आला.

एक महिन्यात दलात नोकरी लावून देतो. त्यासाठी दोन लाख रुपये लागतील, असे त्याने सांगितले. त्याच्या अंगावरील गणवेश पाहून फिर्यादीने त्याच्या बोलण्यावर विश्वास ठेवला. त्यांनी रोख व ऑनलाइन मिळून अशी १ लाख ७५ हजार रुपये पाठविले. यानंतर अनेक वेळा फिर्यादी यांनी सूर्यवंशीला संपर्क साधण्याचा प्रयत्न केला मात्र त्याच्याकडून समाधानकारक उत्तर मिळत नव्हतं. त्यानंतर आपली फसवणूक झाली असल्याचे लक्षात आल्यानंतर फिर्यादी यांनी पोलिसात धाव घेतली.