Pune Crime: जीवे ठार मारण्याची धमकी देत अल्पवयीन मुलीवर बलात्कार; ७ वर्षानंतर नराधमाला २० वर्ष कारावासाची शिक्षा

सचिन जाधव, साम प्रतिनिधी

अल्पवयीन मुलीवर लैंगिक अत्याचार केल्याप्रकरणी पुणे जिल्हा सत्र न्यायालयाने आरोपीला २० वर्षे सश्रम कारावासाची शिक्षा सुनावली. अतिरिक्त सत्र न्यायाधीश एस. आर. साळुंखे यांनी शुक्रवारी (ता. २१) हा निकाल दिला. भीमराव मुकिंदा कांबळे (वय २७, रा. सांडस, ता. कळमनुरी, जि. हिंगोली) असे शिक्षा सुनावलेल्या आरोपीचे नाव आहे.

पोलीस उपायुक्त डॉ. राजकुमार शिंदे यांनी दिलेल्या माहितीनुसार, हडपसर परिसरात २०१८ मध्ये अल्पवयीन मुलीवर लैंगिक अत्याचाराची घटना घडली होती. याबाबत पीडित १४ वर्षीय मुलीने हडपसर पोलिसात फिर्याद दिली होती. या प्रकरणी कांबळे याच्यावर हडपसर पोलीस ठाण्यात लैंगिक अत्याचारापासून बालकांचे संरक्षण (पोक्सो) कायद्यान्वये गुन्हा दाखल करण्यात आला होता.

या प्रकरणात तपासी अधिकारी म्हणून सहाय्यक पोलीस निरीक्षक कल्याणी शिंदे यांनी काम पाहिले. आरोपीला अटक करण्यात आल्यानंतर त्याच्यावर खटला चालवण्यात आला. याप्रकरणी न्यायालयाने ८ साक्षीदार तपासले. त्यामध्ये पीडितेची साक्ष महत्त्वाची ठरली. पोलिसांनी तपास करून दोषारोपपत्र दाखल केले.

कधी घडली होती घटना

अल्पवयीन मुलीवर अत्याचार केल्याची घटना २०१८ मध्ये घडली होती. याप्रकरणाचा तपास करत पोलिसांनी भिमराव मुकिंदा कांबळे या व्यक्तीला अटक केली. अत्याचार प्रकरणाचा तपास करत पोलिसांनी दोषारोप पत्र दाखल केलं. न्यायालयाने ८ साक्षीदारांचा साक्ष घेतली. त्यानंतर आज ७ वर्षानंतर नराधमाला कारावासाची शिक्षा सुनावलीय.

आरोपी हा पीडितेच्या घराशेजारी असलेल्या पोल्ट्रीमध्ये काम करायचा. घटनेच्या दिवशी नराधम भिमरावने पीडिता एकटी असल्याचा फायदा घेतला आणि अत्याचार केला. पीडिता घरी एकटी होती, त्यादिवशी घरात लाईट नव्हती याचा फायदा घेत अत्याचार केला. घडलेल्या प्रकाराबदद्ल कोणाला त्याचा वाच्यता केली तर जीवे मारू अशी धमकीही नराधमाने पीडितेला दिली होती. त्याने पीडितेला मारहाण देखील केली होती.

घटनेबाबत कोणाला सांगू नये, यासाठीही तिच्यावर दबाव आणला होता. मात्र पीडिता गर्भवती राहिल्यानंतर हा प्रकार उघडकीस आला. त्यानंतर पोलिसांनी कारवाई करत गुन्हा दाखल करून आरोपीला अटक केली होती.