Pune Crime News : वॉशिंग मशीन विकायला गेला आणि गमवून बसला दीड लाख रुपये; पुण्यात सायबर चोरट्यांचा सुळसुळाट

अक्षय बडवे

Pune Crime News :

पुण्यात सायबर क्राईमच्या घटनांमध्ये मोठी वाढ झाली आहे. दररोज अशा फसवणुकीच्या अनेक घटना समोर येत आहेत. अशात ऑनलाईन वॉशिंग मशीन विकणाऱ्या एका तरुणाला लाखो रुपयांचा गंडा घातल्याची घटना समोर आलीये. सदर घटनेबाबत पोलिसांत तक्रार दाखल केली असून अधिक तपास सुरू आहे.

ओएलएक्सवर वॉशिंग मशीन विकण्याची जाहिरात या व्यक्तीने दिली होती. वस्तू खरेदीच्या बहाण्याने एकाने क्युआर कोड पाठवून फसवणूक केली. या फसवणुकीत तब्बल दीड लाख रुपये लंपास करण्यात आलेत. पुण्यातील वाघोली परिसरात हा धक्कादायक प्रकार घडला आहे.

एका इलेक्ट्रॉनिक्स शोरुम व्यवस्थापकाने लोणीकंद पोलिस ठाण्यात फिर्याद दिलीये. पोलिसांनी दिलेल्या माहितीनुसार, फिर्यादी यांना इलेक्ट्रॉनिक्स शोरूमकडून वॉशिंग मशीन भेट मिळाली होती. मात्र ती वापरायची नसल्यामुळे त्यांनी ती विकायची ठरवली. यासाठी त्यांनी त्या वॉशिंग मशीनची जाहिरात ओएलएक्सवर या वेबसाईटवर अपलोड केली.

एका व्यक्तीने मशिन खरेदी करण्याच्या बहाण्याने फिर्यादीशी संपर्क साधला. मशीनबाबत सर्व माहिती घेऊन फिर्यादीच्या मनात विश्वास निर्माण केला. त्यानंतर आरोपीने फिर्यादीला क्यूआर कोड पाठवला आणि पाच रुपये पाठविण्यास सांगितले. त्यानंतर विकत घेतलेल्या मशीनचे सर्व पैसे तुमच्या अकाउंटला येतील असं त्याने सांगितलं.

क्यूआर कोड स्कॅन करून ५ रुपये पाठवल्यावर त्यांच्या बँक खात्यातून एक लाख ५५ हजार रुपये कट झाले. आपली फसवणूक झाल्याचं लक्षात येताच त्यांनी पोलिसांत धाव घेतली. या प्रकरणी अज्ञात व्यक्तीविरुद्ध गुन्हा दाखल करण्यात आला आहे. तसेच पोलीस सदर व्यक्तीचा शोध घेत आहेत.