Pune Crime: मित्रासोबत फिरायला गेलेल्या तरुणीवर सामूहिक अत्याचार, बोपदेव घाटातील घटना; पुणे हादरलं

नितीन पाटणकर, पुणे

Pune Bopdev Ghat Crime: गेल्या काही दिवसांपासून राज्यात अत्याचाराच्या घटना समोर येत आहेत. कालच पुण्यामध्ये दोन अल्पवयीन मुलींवर स्कूल बसमध्येच अत्याचार झाल्याची घटना समोर आली होती. हे प्रकरण ताजे असतानाच कोंढवा परिसरातील बोपदेव घाटामध्ये तरुणीवर सामुहिक अत्याचार झाल्याची खळबळजनक घटना घडली आहे. या प्रकरणी अज्ञातांविरोधात गुन्हा दाखल करण्यात आला आहे.

समोर आलेल्या माहितीनुसार, पुण्यातील कोंढवा परिसरात असलेल्या बोपदेव घाटामध्ये सामुहिक अत्याचाराची भयंकर घटना समोर आली आहे. गुरुवारी रात्री ११ वाजण्याच्या सुमारास २१ वर्षीय तरुणीवर तिघा अज्ञात तरुणांनी सामूहिक अत्याचार केला. या घटनेने परिसरात एकच खळबळ उडाली असून याप्रकरणी कोंढवा पोलीस ठाण्यात गुन्हा दाखल करण्यात आला आहे.

पिडीत तरुणी ही मित्राबरोबर बोपदेव घाटात फिरण्यासाठी गेली होती. यावेळी तीन अज्ञात नराधमांनी सामूहिक बलात्कार केला. पीडित तरुणीला सध्या रुग्णालयात दाखल करण्यात आले असून तिच्यावर उपचार सुरू आहेत. बलात्कार करणाऱ्या तिन्ही आरोपीचा शोध कोंढवा पोलिसांसह गुन्हे शाखा घेत आहेत.