Shocking : आधी मैत्री केली, नंतर वारंवार सामूहिक अत्याचार, व्हिडीओ रेकॉर्ड केला अन्...; 'त्या' सहा जणांनी क्रूरतेचा कळसच गाठला

कर्नाटकमधील बेळगाव शहरात एका अल्पवयीन मुलीवर वारंवार सामूहिक बलात्काराची घटना उघडकीस आली आहे. या प्रकरणी पोलिसांनी आरोपींना अटक केली आहे. सर्व आरोपी प्रौढ आहेत, तर पीडिता अल्पवयीन आहे. या घटनेत ६ गुन्हेगार आहेत, त्यापैकी ५ जणांना अटक केली आहे, एकजण फरार आहे, अशी माहिती पोलिसांनी दिली आहे.

मिळालेल्या माहितीनुसार, सहा आरोपींनी मुलीला एका निर्जन जागी नेले आणि तिच्यावर सामूहिक बलात्कार केला. त्यांनी संपूर्ण घटना त्यांच्या मोबाईल फोनवर रेकॉर्ड केली. कोणाला काही सांगितलंस तर याद राख अशी धमकी आरोपींनी पीडितेला दिली. त्यानंतर जानेवारी महिन्यात आरोपींच्या गटातील तिघांनी पुन्हा तिच्यावर बलात्कार केला.

पीडित मुलीने घडलेला प्रकार तिच्या कुटुंबियांना सांगितला. या घृणास्पद गुन्ह्याची माहिती मिळताच पीडितेच्या कुटुंबीयांनी एपीएमसी पोलीस ठाण्यात एफआयआर दाखल केला. त्यानंतर पोलिसांनी वेगाने तपास करत सहा आरोपींपैकी पाचजणांना अटक केली. सध्या सहावा आरोपी फरार आहे, त्याला शोधण्यासाठी पोलिसांचे प्रयत्न सुरु आहेत.

बेळगावचे पोलीस आयुक्त बोरसे भूषण यांनी या प्रकरणाची माहिती दिली. 'सर्व आरोपी प्रौढ आहेत. त्यांच्या विरुद्ध पॉक्सोअंतर्गत गुन्हा दाखल करण्यात आला आहे. डिसेंबर महिन्यात आरोपींपैकी एकाने मुलीशी मैत्री केली आणि तिला निर्जन ठिकाणी नेले. फोन करुन मित्रांना बोलावले. आरोपींनी मुलीवर सामूहिक बलात्कार केला आणि सर्व घटना मोबाईलच्या कॅमेऱ्यामध्ये कैद केली. व्हिडीओ लीक करु अशी धमकी देत सहापैकी तिघांनी मुलीवर पुन्हा बलात्कार केला. फॉरेन्सिक टीम सर्व नमुने आणि पुरावे गोळा करत आहे. या प्रकरणात आरोपींवर कठोर कारवाई केली जाईल', अशी माहिती बेळगावच्या आयुक्तांनी दिली.