1 फ्लॅट, 3 पुरूष आणि 1 तरुणी; लातूरमध्ये वेश्याव्यवसायाचा भांडाफोड, पोलिसांनी असा रचला सापळा

लातूर शहरात चालणाऱ्या देहव्यापार रॅकेटचा पोलिसांनी पर्दाफाश केलाय. या कारवाईत पोलिसांनी दोघांना अटक केली असून २१ वर्षीय तरुणीची सुटका केली आहे. पोलिसांच्या मते या तरुणीला जबरदस्तीने वेश्या व्यवसायात ढकलण्यात आले होते. या प्रकरणातील एक संशयित आरोपी घटनास्थळावरून फरार होण्यात यशस्वी झाला. याप्रकरणी स्थानिक पोलीस ठाण्यात गु्न्हा दाखल करण्यात आलाय.

ही कारवाई लातूरमधील माऊली नगर भागात करण्यात आली. या परिसरातील एका फ्लॅटमध्ये वेश्याव्यवसाय चालवला जात असल्याची माहिती पोलिसांना मिळाली होती. केवळ मिळालेल्या माहितीच्या आधारे थेट छापा न टाकता, पोलिसांनी आधी त्या माहितीची खातरजमा करण्याचा निर्णय घेतला. त्यावेळी पोलिसांनी साफळा रचला आणि ग्राहक म्हणून पोलीस कर्मचाऱ्यांना तेथे पाठवलं. त्यावेळी खरोखरच वेश्याव्यवसाय चालवला जात असल्याचं आढळून आले. त्यानंतर पोलिसांनी त्या फ्लॅटवर छापा टाकला.

पोलिसांच्या माहितीनुसार, घटनास्थळावरून दोन व्यक्तींना अटक करण्यात आलीय. त्यांची ओळख जावेद युसूफ सय्यद आणि जयश्री राम तारोटे अशी पटलीय. दरम्यान,आणखी एक व्यक्ती पोलिसांच्या तावडीतून निसटून पळून जाण्यात यशस्वी झाली. या छाप्यात पोलिसांनी एका २१ वर्षीय तरुणीचीही सुटका केलीय. ही तरुणी नागपूरची रहिवासी आहे. पोलिसांच्या म्हणण्यानुसार, चौकशीदरम्यान तिने सांगितले की, तिला वेश्याव्यवसायासाठी भाग पाडले जात होतं.

तरुणीच्या म्हणण्यानुसार, ग्राहकांकडून मिळालेले पैसे दोन आरोपी आणि इतर काही व्यक्तींमध्ये वाटून घेतले जात होते. या कथित रॅकेटमध्ये आणखी कोण सामील आहे आणि त्याचे जाळे किती पसरलेले आहे, याचा तपास पोलीस करत आहेत. लातूरच्या शिवाजीनगर पोलीस ठाण्यात याप्रकरणी गुन्हा दाखल करण्यात आलाय. पोलिसांनी भारतीय न्याय संहिता (BNS) आणि अनैतिक व्यापार (प्रतिबंध) कायद्यांतर्गत कारवाई सुरू केलीय. दोन संशयितांना अटक करण्यात आली असून तिसऱ्या व्यक्तीचा शोध सुरू आहे. पोलीस या प्रकरणाचा अधिक तपास करत आहेत.