Shocking : ४ महिन्यांचा संसार अर्ध्यावरती मोडला; नवऱ्याने बायकोला खोलीत नेलं अन् भयंकर घडलं

Haryana Gurugram Kajal Murder By Her Husband Arun हरियाणातील गुरुग्राममध्ये एका तरुणाने आपल्या पत्नीला विषारी इंजेक्शन देऊन तिची हत्या केल्याची धक्कादायक बातमी समोर आली आहे. बायकोच्या माहेरच्या मंडळींनी हुंडा न दिल्याच्या रागातून त्याने हे पाऊल उचलले असल्याचे पीडितेच्या कुटुंबीयांनी आरोप केले आहेत आरोपी सध्या फरार असून पोलीस त्याचा शोध घेत आहेत.

मिळालेल्या माहितीनुसार, सदर मृत महिलेचं नाव काजल असून तिचा ४ महिन्यांपूर्वी अरुण शर्मा या तरुणाशी विवाह झाला. काजल एका हॉस्पिटलमध्ये नर्सचं काम करायची तर अरुण शर्मा हा त्याच हॉस्पिटलमध्ये काम करत होता. या दोघांमध्ये लग्नाच्या १ महिन्यानंतर खटके उडत होते. काजलने याबद्दल तिच्या कुटुंबियांना माहिती दिली होती.

अरुण काजलकडे सतत हुंड्याची आणि पैशांची मागणी करून तिचा छळ करत होता. बुधवारी काजल आणि तिची नणंद दोघीच घरी होत्या. यादरम्यान अचानक तिथे अरुण आला आणि काजलला घेऊन खोलीत गेला. तिथे तिला एक विषारी इंजेक्शन देऊन तिची हत्या केली.

थोड्या वेळाने काजलची नणंद तिथे पोहोचली, तेव्हा काजल जमिनीवर बेशुद्ध अवस्थेत पडलेली होती, तिच्या नाकातून रक्त वाहत होते आणि तिच्या हातावर इंजेक्शनची खूण होती. कुटुंबीयांनी तात्काळ काजलला एका खाजगी रुग्णालयात नेले, जिथे डॉक्टरांनी तिला मृत घोषित केले. याप्रकरणी पोलीस ठाण्यात तक्रार दाखल करण्यात आली असून पोलीस या घटनेचा सखोल तपास करत आहेत. आरोपी अरुण हा सध्या फरार असून पोलीस त्याला शोधत आहेत.