Crime News: भय इथले संपत नाही! लोखंडी रॉड, काठ्या आणि चाकूने तरुणावर बीडमध्ये भरदिवसा अमानुष हल्ला, धक्कादायक कारण समोर

Crime News: बीड जिल्ह्यातील हिंसाचाराच्या घटना थांबण्याचे नाव घेत नसून पुन्हा एक घटना समोर आली आहे. शिरूर कासार तालुक्यातील खलापुरी येथे शुल्लक कारणावरून एका तरुणावर लोखंडी रॉड, लाकडी दांड्यां आणि चाकूने भरदिवसा अमानुष मारहाण केल्याची धक्कादायक घटना मंगळवारी सकाळी साडेदहा वाजण्याच्या सुमारास घडली. या प्रकरणी चार जणांविरुद्ध शिरूर कासार पोलीस ठाण्यात गुन्हा दाखल करण्यात आला असून सर्व आरोपी फरार आहेत.

जखमी तरुणाचे नाव नितीन कल्याण लोंढे (वय ३२) असे असून तो खलापुरी येथील सतीश यांच्या हॉटेलवर गेला होता. वाढदिवसाच्या कार्यक्रमात झालेल्या एका वादाबाबत चर्चा करण्यासाठी तो मोमीन पठाण यांना भेटायला गेला असता, रोहित तुळशीदास गायकवाड, शुभम आण्णा लोंढे, आसिफ मोमीन शेख आणि साहिल मोमीन पठाण या चौघांनी त्याच्यावर अचानक हल्ला केला. हल्लेखोरांनी नितीन लोंढे यांच्या डोक्यात लोखंडी रॉडने वार केले, हातावर चाकूने वार करून जीवे मारण्याचा प्रयत्न केला, तसेच उजव्या बाजूच्या बरगड्यांवर बेदम मारहाण केली.

या संपूर्ण घटनेचा सीसीटीव्ही फुटेज सोशल मीडियावर व्हायरल झाला असून परिसरात खळबळ उडाली आहे. जखमी नितीन लोंढे यांच्यावर सध्या बीड जिल्हा शासकीय रुग्णालयात उपचार सुरू आहेत. घटनेनंतर चार दिवस उलटूनही पोलीस पंचनाम्यासाठी घटनास्थळी फिरकले नसल्याचा आरोप पीडित कुटुंबीयांनी केला आहे. आरोपींविरोधात कठोर कारवाई करण्यात यावी, अशी जोरदार मागणी करण्यात येत आहे.

दरम्यान, संबंधित चौघांची गावात आधीपासूनच दहशत असल्याचा आरोप नागरिकांनी केला आहे. यापूर्वीही मारहाणीच्या घटनांमध्ये त्यांची नावे आल्याचे सांगण्यात येत असून, ठोस कारवाई न झाल्यामुळे गावकरी संतप्त आहेत. या प्रकरणाचा पुढील तपास पोलीस उपनिरीक्षक खांडखुळे करत आहेत.