Akola News : तुमची मुलं किती सुरक्षित? चॉकलेटचं आमिष देऊन ८ मुलांच्या अपहरणाचा प्रयत्न; महिलांनी दिला चोप

अक्षय गवळी, अकोला

अकोल्यातल्या मनपा उर्दू क्रमांक एक शाळेतील 8 विद्यार्थ्यांचा अपहरणाचा प्रयत्न करण्यात आला. मात्र हा अपहरणाचा प्रयत्न शिक्षकांनी हाणून पाडत ८ ही मुलांची सुटका केली आहे. सायंकाळ पाच'च्या नंतर शाळा सुटल्यानंतर एका महिलेनं विद्यार्थ्यांना चॉकलेट आणि कचोरीचं आमिष देत सोबत न्यायचा प्रयत्न केला, यामध्ये 4 मुलं आणि 4 मुलींचा समावेश होता. अपरहणकर्त्या महिलेला स्थानिक महिलांनी चांगलाचं चोप दिला असून पोलिसांच्या ताब्यात दिलं आहे.

अपहरणकर्त्या महिलेला सिटी कोतवाली पोलिसांच्या ताब्यात दिलं आहे. पुढील तपास आणि कारवाई सुरू आहे. महिलेंचं अपहरणाचं बिंग फुटल्यानंतर आपण मुलांचे नातेवाईंक असल्याचे सांगत होती, पण कुटुंबियांनी आणि शालेय शिक्षकांच्या सतर्कतेमुळे हा संपूर्ण प्रकार उजेडात आला आहे.

दरम्यान आज सायंकाळी 5 वाजताच्या सुमारास अकोला महापालिकेच्या 'उर्दू मराठी क्रमाक 1' शाळा सुटलीय. सर्व विद्यार्थी शाळेबाहेर पडले, तितक्यात एका 40 वर्षीय महिलेनं 7 ते 8 शालेय विद्यार्थ्यांना चॉकलेट आणि कचोरी सोबतचं खजूरचं आमिष दिलं. त्यानंतर सोबत नेण्याचा बळजबरी प्रयत्न केला, हा प्रकार शिक्षक आणि पालकांच्या लक्षात आला. त्यांनी धाव घेतली आणि महिलेच्या ताब्यातील मुलांची सुटका केली. या घटनेनंतर शाळेच्या आवारात घटनास्थळावर नागरिकांसह पालकांनी मोठी गर्दी झाली होती. शालेय शिक्षकांसह नातेवाईकांनी सिटी कोतवाली पोलीस स्टेशन गाठलं, अन् तक्रार नोंदवली. या प्रकरणी पोलिस अधिक तपास करत आहेत.

नातेवाईकांनी दिलेल्या तक्रारीनंतर पोलीस ठाण्यात अपहरणाचा प्रयत्न केल्याप्रकरणी गुन्हा दाखल करण्यात आला. अपहरणकर्त्या महिलेला ताब्यात घेतलं असून वैद्यकीय तपासणीसाठी पाठवण्यात आले आहे, अशी माहिती अकोला पोलीस ठाण्याचे पोलीस निरीक्षक सुनिल वायदांदे यांनी दिली.