Ahmednagar Crime: मित्रानेच मित्राला संपवले, मृतदेह ऊसाच्या शेतात फेकला; भयंकर हत्येचा महिन्यानंतर उलगडा

सचिन बनसोडे, अहमदनगर| ता. ३० डिसेंबर २०२३

Ahmednagar Crime News:

अहमदनगर जिल्ह्यातील राहाता येथे तरूणाची मित्रानेच हत्या केल्याचा धक्कादायक प्रकार उघडकीस आला आहे. एका महिनाभरापासून बेपत्ता असलेल्या गौरव शिरसाठ याची मित्रानेच मारहाण करून हत्या केल्याचं स्पष्ट झालं असून आरोपीला पोलीसांनी जेरबंद केले आहे. या घटनेने संपूर्ण अहमदनगर जिल्हा हादरुन गेला आहे. (Crime News in Marathi)

याबाबत सविस्तर माहिती अशी की, अहमदनगरच्या (Ahmednagar) राहाता शहरातील गौरव पंडित शिरसाठ हा ३० वर्षीय तरुण महिनाभरापूर्वीपासून बेपत्ता होता. तो बेपत्ता झाल्याची तक्रार त्याच्या आई वडिलांनी राहता पोलीस ठाण्यात दिली होती. या तक्रारीनुसार पोलिसांनी तपास सुरू केला होता.

हा तपास सुरू असतानाच गौरव शिरसाठचा मित्र किरण मोरेही बेपत्ता असल्याची माहिती पोलिसांना मिळाली. या माहितीवरुन पोलिसांनी किरण मोरेचा शोध घेण्यास सुरूवात केली. किरण मोरेला ताब्यात घेतल्यानंतर सखोल चौकशी केली असता त्यानेच गौरव शिरसाठची हत्या केल्याचे कबुल केले.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

किरण मोरेने गौरव शिरसाठ याची लाकडी दांडक्याने मारुन निर्घृण हत्या केल्याची कबुली दिली आहे. तसेच पुरावा नष्ट करण्याच्या दृष्टीने मृतदेह उसाच्या शेतात टाकल्याचेही तपासात समोर आले आहे. या प्रकरणी किरण बबन मोरे या आरोपीस पोलिसांनी जेरबंद केले आहे.. मृतदेहाचे जागेवरच शवविच्छेदन करण्यात आले असून ३०२,२०१ प्रमाणे गुन्हा नोंदविण्यात आला आहे. (Latest Marathi News)