Vande Bharat news: अरे वा! प्रवासाच्या १५ मिनिटे आधीच बुक करू शकता वंदे भारत एक्सप्रेसचे तिकीट, जाणून घ्या संपूर्ण माहिती

जर तुम्हाला वंदे भारत एक्सप्रेसने प्रवास करायचा असेल तर तुमच्यासाठी ही महत्त्वाची बातमी आहे. रेल्वे प्रवास करताना प्रवाशांना आधीच तिकीट काढावे लागते. परंतु वंदे भारत रेल्वेचं तिकीट आता तुम्ही ट्रेन सुटण्याच्या फक्त १५ मिनिटे आधीही बुक करू शकता.

अहमदाबाद मिररच्या बातमीनुसार, पश्चिम रेल्वे प्रवाशांसाठी ही सेवा सुरू करण्याच्या विचारात आहे. लवकरच ही सुविधा सुरू केली जाण्याची शक्यता आहे. सध्या दक्षिण रेल्वेने १७ जुलैपासून पायलट प्रोजेक्ट म्हणून अशी सेवा सुरू केलीय. यामध्ये, आठ वंदे भारत गाड्यांसाठी ही 'करंट बुकिंग' सुविधा उपलब्ध करून देण्यात आलीय.

आता प्रवासी या गाड्यांमध्ये मध्यवर्ती स्थानकांवरूनही रिकाम्या जागांच्या आधारे ऑनलाइन तिकिटे बुक करू शकतात, तेही त्या स्थानकावरून ते पण ट्रेन सुटण्याच्या १५ मिनिटे आधी. सध्या, ही सेवा मंगळुरू सेंट्रल-तिरुवनंतपुरम सेंट्रल वंदे भारत एक्सप्रेस आणि तिच्या परतीच्या वाहतूक सेवेसारख्या गाड्यांमध्ये सुरू करण्यात आलीय. पूर्वीच्या प्रणालीनुसार, ट्रेनने तिचे सोर्स स्टेशन सोडताच, पुढील स्थानकांवरून तिकीट बुकिंगची सुविधा बंद केली जात होती, परंतु आता या नवीन प्रणालीमुळे प्रवाशांना अधिक सुविधा मिळणार आहे.

पश्चिम रेल्वेच्या वरिष्ठ अधिकाऱ्यांच्या मते, जर दक्षिण रेल्वेमध्ये हे यशस्वी झाले. तसेच या सुविधेला प्रवाशांकडून चांगला प्रतिसाद मिळाला तर अहमदाबादसह संपूर्ण पश्चिम रेल्वेमध्ये ते लागू केले जाणार आहे. अहमदाबाद मिररमधील वृत्तानुसार मध्य रेल्वेच्या एका वरिष्ठ अधिकाऱ्याने सांगितले की, आमच्या विभागांतर्गत धावणाऱ्या आठ वंदे भारत गाड्यांमध्ये ही सुविधा लागू करण्यात आलीय.

जागांच्या उपलब्धतेवर ही सुविधा अवलंबून आहे. प्रवासी ही तिकिटे ऑनलाइन देखील बुक करू शकतात. रेल्वे अधिकाऱ्यांचे म्हणणे आहे की, या निर्णयामुळे विशेषतः टियर-२ शहरे आणि लहान शहरांमधील प्रवाशांना फायदा होईल. यामुळे शेवटच्या क्षणी प्रवास करणाऱ्या प्रवाशांना अधिक सुविधा मिळेल. तसेच प्रीमियम गाड्यांमध्ये रिकाम्या जागांची संख्या कमी होते.