Success Story: लहानपणी आईवडिलांचे छत्र हरपलं; आजीने भाजी विकून मोठं केलं, UPSC क्रॅक करत कॉन्स्टेबल उदय कृष्णा रेड्डी झाले IPS अधिकारी

प्रत्येकाच्या आयुष्यात काही न काही संघर्ष असतो. कोणीही लगेच कोणतेही प्रयत्न न करता यशस्वी होत नाही. यासाठी दिवसरात्र मेहनत करावी लागते. आपल्यातच परिस्थिती बदलण्याची ताकद असते. फक्त त्यासाठी इच्छाशक्ती आणि मेहनत करणे गरजेचे आहे. असंच काहीसं आयपीएस उदय कृष्ण रेड्डी यांनी केलं. आपल्या अपमानाचा बदला घेण्यासाठी त्यांनी थेट यूपीएससी परीक्षा दिली आणि पासदेखील केली.

लहानपणी आईवडिलांचे छत्र हरपलं, आजीने भाजी विकून मोठं केलं

आयपीएस उदय कृष्णा रेड्डी यांचा प्रवास खूपच खडतर आहे. वयाच्या अवघ्या ५व्या वर्षी त्यांनी आपल्या आईला गमावलं. काही दिवसानंतर त्यांच्या वडिलांचेही छत्र हरपलं. यावेळी त्यांच्या आजीने त्यांना लहानाचं मोठं केलं. त्यांची आजी भाजी विकायची. यातून त्यांचा घरखर्च चालायचा. त्यांच्या आजीने त्यांच्या शिक्षणात कोणतीही कमी पडू दिली नाही. त्यांनान खूप सपोर्ट केला.

डॉक्टर होण्याचे स्वप्न पण झाले पोलिस

उदय यांनी डॉक्टर व्हायचे होते. त्यांनी मेडिकल लॅब टेक्निशियनचे शिक्षणदेखील घेतले होते. परंतु आर्थिक परिस्थिती नसल्यामुळे ते पुढे शिकू शकले नाही. परंतु तरीही त्यांनी हार मानली नाही. कुटुंबाची आर्थिक परिस्थिती बदलण्यासाठी त्यांनी अभ्यासासोबत सरकारी नोकरीची तयारी केली. त्यांची पोलिस कॉन्स्टेबल म्हणून निवडदेखील झाली.

एका अपमानाने बदलले जीवन

पोलिस कॉन्स्टेबल पदावर ते कार्यरत होते. मात्र, त्यांचा अनेकदा अपमान व्हायचा. २०१८ मध्ये एका सिनियर ऑफिसरने त्यांचा अपमान केला होता. त्या क्षणी त्यांनी नोकरीचा राजीनामा दिला होता. त्यानंतर त्यांनी दृढ निश्चय केला. त्यांनी यूपीएससी परीक्षा दिली.

उदय कृष्ण रेड्डी यांनी २०२३ मध्ये पहिल्यांचा यूपीएससी (UPSC) दिली आणि पासदेखील केली. त्यांना ७८० रँक प्राप्त झाली होती. त्यानंतर त्यांनी पुन्हा यूपीएससी दिली यावेळी त्यांना ३५० रँक मिळाली. यानंतर ते आयपीएस अधिकारी झाले.