New ₹20 Note: वीस रुपयांची नवीन नोट येणार, रचना कशी असणार? आरबीआयची मोठी घोषणा

भारतीय रिझर्व्ह बँक लवकरच 20 रुपयांची नवीन नोट जारी करणार असल्याची माहिती शनिवारी दिली. यासोबतच जुन्या नोटांच्या व्यवहारावर कोणतीही बंदी घालण्यात येणार नसल्याचेही स्पष्ट करण्यात आले आहे.

RBI च्या माहितीनुसार, नव्या 20 रुपयांच्या नोटांवर गव्हर्नर संजय मल्होत्रा यांची स्वाक्षरी असणार आहे. या नोटांचे डिझाईन 'महात्मा गांधी न्यू सीरीज'मधील सध्याच्या 20 रुपयांच्या नोटांप्रमाणेच असणार आहे.

जुन्या नोटा देखील चलनात राहणार

RBI ने स्पष्ट केले की, नवीन नोटा जारी झाल्यानंतरही जुन्या नोटा चलनात राहतील. म्हणजेच, जुन्या नोटा बाद होणार नाहीत, त्या पूर्वीप्रमाणेच वापरता येणार आहेत. नवीन नोटा फक्त त्या चलनात समाविष्ट केल्या जातील.

नवीन नोटाचे डिझाईन कसे असणार?

नव्या नोटांचे डिझाईन सध्याच्या नोटांपेक्षा थोडेफार वेगळे असू शकते. यात काही नवीन वैशिष्ट्ये व रंग पाहायला मिळू शकतात. महात्मा गांधींचा फोटो अधिक स्पष्ट असेल, तसेच वॉटरमार्क, सिक्युरिटी थ्रेड आणि क्रमांक पॅटर्न अधिक मजबूत केले जातील.

नवीन नोटा का जारी केल्या जातात?

रिझर्व्ह बँकेचा उद्देश म्हणजे चलन सुरक्षित ठेवणे आणि फसवणुकीपासून संरक्षण मिळवणे. नकली नोटांपासून बचाव व्हावा, यासाठी RBI वेळोवेळी नवीन नोटा जारी करते. तसेच नवीन गव्हर्नर आल्यावर त्यांच्या स्वाक्षरीनिशी नोटा जारी केल्या जातात.

जुन्या नोटा बदलाव्या लागतील का?

नाही, नागरिकांना जुनी 20 रुपयांची नोट बदलण्याची गरज नाही. बँकेत जमा करण्याचीही गरज नाही. नवीन नोटा बाजारात आल्यावर तुम्ही दोन्ही - जुन्या व नव्या नोटांचा वापर करू शकता. बँकांद्वारे व एटीएममधून या नव्या नोटा तुमच्यापर्यंत पोहोचतील.

एकंदरीत, RBI नव्या 20 रुपयांच्या नोटा जारी करत असून जुन्या नोटा पूर्वीप्रमाणेच व्यवहारात वापरता येणार आहेत.