RBI Bank : १ जानेवारीपासून चेकबुकचे नियम बदलणार, नेमकं काय आहे सत्य?

सोशल मीडियावर सध्या बँकेच्या चेकबुकबाबत एक पोस्ट वेगाने व्हायरल होत आहे. या पोस्टमध्ये 1 जानेवारी 2027 पासून चेकबुकसंदर्भात नवा नियम लागू होणार असल्याचा दावा करण्यात आला आहे. मात्र, हा दावा पूर्णपणे खोटा असल्याचे रिझर्व्ह बँक ऑफ इंडियाने (RBI) स्पष्ट केले आहे. त्यामुळे बँक ग्राहकांनी या व्हायरल मेसेजवर विश्वास ठेवू नये, असे आवाहन आरबीआयने केले आहे.

नेमका काय आहे व्हायरल मेसेज?

सोशल मीडियावर शेअर केल्या जाणाऱ्या एका नोटीसमध्ये 'RBI New Cheque Book Rule From 1 Jan 2027' असे लिहिले आहे. म्हणजेच 1 जानेवारी 2027 पासून चेकबुकचा नवा नियम लागू होणार असल्याचा दावा या पोस्टमधून केला जात आहे. अनेक लोक कोणतीही खात्री न करता ही पोस्ट पुढे शेअर करत आहेत.

RBI ने काय दिले स्पष्टीकरण?

या व्हायरल पोस्टची दखल घेत रिझर्व्ह बँक ऑफ इंडियाने 7 नोव्हेंबर रोजी सोशल मीडिया प्लॅटफॉर्म वर एक पोस्ट शेअर केली. या पोस्टमध्ये आरबीआयने व्हायरल होत असलेल्या नोटीसचा फोटोही जोडला आहे. मात्र, या फोटोवर मोठ्या अक्षरात 'FAKE' असे लिहिले आहे. आरबीआयने स्पष्ट केले की, चेकबुकच्या नियमांमध्ये कोणताही बदल करण्याचा निर्णय घेण्यात आलेला नाही. तसेच 1 जानेवारी 2027 पासून कोणताही नवीन चेकबुक नियम लागू होणार नाही. त्यामुळे सोशल मीडियावर व्हायरल होणारी ही माहिती दिशाभूल करणारी आहे.

बँक ग्राहकांनी काय काळजी घ्यावी?

आजकाल सोशल मीडियावर बनावट सरकारी नोटिसा आणि खोट्या बातम्या मोठ्या प्रमाणात व्हायरल होत असतात. अनेकदा लोक अशा पोस्टची सत्यता तपासल्याशिवाय त्या पुढे पाठवतात. त्यामुळे इतर लोकांमध्येही गैरसमज निर्माण होतो. त्यामुळे बँकेशी किंवा सरकारी नियमांशी संबंधित कोणतीही माहिती मिळाल्यास तिची खात्री अधिकृत वेबसाइट किंवा सोशल मीडिया अकाउंटवरून करून घ्या. कोणतीही माहिती खरी असल्याची खात्री होईपर्यंत ती पुढे शेअर करू नका, असे आवाहन करण्यात येत आहे.