CNG Price : पुण्यात महागाईचा भडका! CNG च्या दरात पुन्हा वाढ, आता १ किलोसाठी मोजावे लागणार 'इतके' रुपये

Pune CNG Price Hike: पुण्यातील ग्रामीण भागात सीएनजी (CNG) पुरवठा करणाऱ्या टॉरेंट गॅस (Torrent Gas) कंपनीने सीएनजीच्या दरात थेट प्रति किलो २ रुपयांची वाढ केली आहे. त्यामुळे सणासुदीच्या काळात सीएनजीवर वाहने चालवणाऱ्या वाहनधारकांच्या खिशाला मोठा फटका बसणार आहे. पेट्रोल डीलर्स असोसिएशनचे अध्यक्ष ध्रुव रुपारेल यांनी दिलेल्या माहितीनुसार, हे नवीन सुधारित दर ७ ऑक्टोबर रोजी मध्यरात्री १२ वाजेपासून संपूर्ण पुणे परिसरात लागू करण्यात आले आहेत.

नवीन दर काय आहेत?

जुना दर: ९८.५० रुपये प्रति किलो

नवीन दर: १००.५० रुपये प्रति किलो

वाढ: २ रुपये प्रति किलो

पेट्रोल डीलर्स असोसिएशन पुणेचे अध्यक्ष ध्रुव रुपारेल यांनी दिलेल्या माहितीनुसार, हे नवे दर ७ ऑक्टोबरच्या मध्यरात्री १२.०१ वाजेपासून लागू झाले आहेत. या दरवाढीमुळे पुण्यात आता सीएनजीच्या किमतीने शंभरी ओलांडली असून, रोज प्रवास करणाऱ्या आणि व्यावसायिक वाहने चालवणाऱ्या चालकांवर अतिरिक्त आर्थिक भार पडणार आहे.

अचानक झालेल्या या दरवाढीमुळे रोज प्रवास करणारे नागरिक, ऑटोरिक्षा चालक, टॅक्सी चालक आणि खाजगी सीएनजी कार मालकांचे मासिक इंधन बजेट कोलमडणार आहे. सणासुदीच्या दिवसांतच इंधनाचे भाव शंभरच्या वर गेल्यामुळे सर्वसामान्यांमधून तीव्र नाराजी व्यक्त केली जात आहे.