पाकिस्ताननं पेट्रोल-डिझेलचे दर घटवले,भारतात इंधनाच्या दर गगनाला भिडले; काय आहेत शेजारील देशातील दर?

एकीकडे भारतात पेट्रोल आणि डिझेलच्या किमती वाढल्या आहेत, दुसरीकडे पाकिस्तान सरकारने सर्वसामान्यांना काहीसा दिलासा देत पेट्रोल आणि हाय-स्पीड डिझेलच्या (HSD) दरात प्रति लिटर ५ रुपयांनी कपात केली आहे. नव्या माहितीनुसार, नवीन दर १६ मे २०२६ पासून लागू झाले आहेत. आंतरराष्ट्रीय बाजारातील कच्च्या तेलाच्या किमतीतील चढ- उताराच्या आधारावर हा निर्णय घेण्यात आला आहे.

पाकिस्तानमध्ये पेट्रोल आणि डिझेलचे दर काय आहेत?

या पाच रुपयांच्या दर कपातीनंतर पाकिस्तानमध्ये पेट्रोलचे नवीन दर ₹४०९.७८ प्रति लिटर आणि डिझेलचा दर ₹४०९.५८ प्रति लिटर झाले आहेत. भारतीय चलनानुार पाकिस्तानमध्ये पेट्रोल आणि डिझेल या दोन्हींची किंमत प्रति लिटर सुमारे १४० ते १४१ भारतीय रुपये आहे.

याचा अर्थ असा की, ही कपात होऊनही, पाकिस्तानमधील इंधन दर भारतापेक्षा अधिक आहेत. मागील साप्ताहिक आढावा बैठकीत पाकिस्तान सरकारने पेट्रोलच्या दरात प्रति लिटर १४.९२ रुपयांनी आणि डिझेलच्या दरात १५ रुपयांनी वाढ करून ग्राहकांना मोठा धक्का दिला होता.

पाकिस्तानमध्ये साप्ताहिक आढावा का घेतला जातोय?

२८ फेब्रुवारी रोजी अमेरिका आणि इस्रायल यांचा इराणसोबत संघर्ष सुरू झाल्यापासून शहबाज शरीफ सरकार पेट्रोलियमच्या किमतींचा साप्ताहिक आढावा घेत आहे. या आंतरराष्ट्रीय तणावामुळे होर्मुझची सामुद्रधुनी बंद झाली, यामुळे जागतिक इंधन संकट निर्माण झाले आहे. शांततेच्या काळात, जगातील तेल आणि वायू पुरवठ्यापैकी अंदाजे २० टक्के पुरवठा या महत्त्वपूर्ण सागरी मार्गातून होतो.

भारत आणि इतर शेजारी देशांमध्ये काय परिस्थिती आहे?

भारतातही पेट्रोल आणि डिझेलच्या दरात बदल झाला असून दर वाढवण्यात आलेत. प्रति लिटर ₹३ रुपयांची वाढ करण्यात आली आहे. सध्या, राजधानी दिल्लीत पेट्रोल सुमारे ₹ ९७.७७ आणि डिझेल ₹९०.६७ रुपये प्रति लिटर आहे. तर मुंबईत पेट्रोल ₹ १०६ रुपयांपेक्षा जास्त आहे. भारताच्या तुलनेत आपल्या शेजारी देशांमधील परिस्थिती खालीलप्रमाणे आहेत.

नेपाळ

नेपाळमध्ये पेट्रोल आणि डिझेल भारतापेक्षा महाग आहेत. भारतीय चलनानुसार नेपाळमध्ये पेट्रोलची किंमत सुमारे ₹ १३४ रुपये प्रति लिटर आणि डिझेलची किंमत सुमारे ₹ १३९ रुपये प्रति लिटर आहे.

बांगलादेश:

बांगलादेशमधील परिस्थिती थोडी संमिश्र आहे. तेथे पेट्रोलचे दर भारतीय रुपयांमध्ये सुमारे १०९ रुपये प्रति लिटर आहेत. भारतापेक्षा थोडे जास्त महाग आहेत. परंतु डिझेलचे दर सुमारे ९० रुपये प्रति लिटर आहेत.

श्रीलंका:

दीर्घकाळाच्या आर्थिक संकटाचा सामना करणाऱ्या श्रीलंकेत इंधनाचे दर वधारले आहेत. भारतीय रुपयांनुसार येथे डिझेलचे दर सुमारे १३७ रुपये प्रति लिटर आहे.

भूतान:

भूतान हा काही मोजक्या शेजारी देशांपैकी एक आहे तेथे पेट्रोल आणि डिझेलचे दर भारतासारखेच आहेत. तिथे पेट्रोलचे दर सुमारे ₹ १०२ आणि डिझेलची किंमत सुमारे ९८ रुपये आहेत.