Mumbai Metro One : मुंबई मेट्रोचा ऐतिहासिक निर्णय! आता व्हॉट्सॲपवर मिनिटांत मिळणार पास; जाणून घ्या प्रोसेस

तुम्हाला माहिती आहे का? व्हॉट्सॲपचा वापर आता केवळ मेसेज आणि व्हिडिओ कॉलपुरता मर्यादित राहिलेला नाही. तर तुम्ही डिजिटल पेमेंटपासून अगदी विविध सेवा घेण्यासाठीही व्हॉट्सॲपचा वापर करू शकता. अशातच आता मुंबईकरांसाठी व्हॉट्सॲपवर एक महत्त्वाची सुविधा सुरू करण्यात आली आहे. मुंबई मेट्रो वनने प्रवाशांसाठी व्हॉट्सॲप आधारित डिजिटल मेट्रो पास सेवा सुरू केली आहे. विशेष म्हणजे, अशा प्रकारची सुविधा सुरू करणारी मुंबई मेट्रो वन ही देशातील पहिली मेट्रो सेवा ठरली आहे.

मुंबई मेट्रो वनच्या वर्सोवा-अंधेरी-घाटकोपर मार्गावर प्रवास करणाऱ्या प्रवाशांना या सुविधेचा लाभ घेता येणार आहे. नव्या डिजिटल व्यवस्थेमुळे मेट्रो पास खरेदी करण्यासाठी प्रवाशांना तिकीट काउंटरवर जाण्याची किंवा प्लॅटफॉर्मचा वापर करण्याची गरज भासणार नाही. व्हॉट्सॲपच्या माध्यमातूनच मेट्रो पास खरेदी करता येणार असून तो डिजिटल स्वरूपात सेव्ह करता येईल.

व्हॉट्सॲपवरून काढलेला मेट्रो पास प्रवाशांच्या मोबाइलमध्येच सेव्ह राहणार असल्याने प्रवासाच्या वेळी तो सहज अॅक्सेस करता येईल. त्यामुळे पास हरवण्याची किंवा कागदी स्वरूपातील तिकीट सांभाळण्याची चिंता कमी होणार आहे. मुंबई मेट्रो वनने दिलेल्या माहितीनुसार, व्हॉट्सॲपवरून खरेदी केलेला मेट्रो पास Google Wallet आणि Apple Walletमध्येही सेव्ह करता येणार आहे. या सुविधेमुळे विशेषतः नियमितपणे मेट्रोने प्रवास करणाऱ्या प्रवाशांचा वेळ वाचणार आहे.

मुंबई मेट्रो वनच्या मते, ही सुविधा शहरातील सार्वजनिक वाहतूक व्यवस्था अधिक डिजिटल आणि प्रवाशांसाठी सोयीची करण्याच्या दिशेने महत्त्वाचे पाऊल आहे. तंत्रज्ञानाचा वापर वाढवून प्रवाशांचा अनुभव अधिक सुलभ करण्याचा या उपक्रमाचा उद्देश आहे. मुंबईत डिजिटल सेवांचा विस्तार होत असताना मेट्रो प्रवासासाठी सुरू करण्यात आलेली ही व्हॉट्सॲप आधारित सुविधा प्रवाशांसाठी नक्कीच उपयुक्त ठरणार आहे.