घरगुती गॅस सिलिंडरच्या किंमती आणखी वाढणार? तीन महिन्यात दोनदा का वाढले दर?

देशभरातील नागरिकांचं बजेट आता कोलमडणार आहे. कारण सरकारनं पुन्हा एकदा स्वयंपाकाच्या गॅसचे दर वाढले आहेत. सरकारी इंधन विक्रेत्यांनी १४.२ किलोच्या घरगुती एलपीजी सिलेंडरच्या दरात २९ रुपयांची वाढ केली आहे, त्यामुळे दिल्लीत प्रति सिलेंडर दर ९१३ रुपयांवरून ९४२ रुपये झाला आहे. हे सुधारित दर ७ जूनपासून लागू झालेत.

सरकारनं तीन महिन्यात दुसऱ्यांदा गॅसचे दर वाढवले आहेत. याआधी ७ मार्च रोजी घरगुती एलपीजी सिलेंडरच्या दरात ६० रुपयांनी वाढ करण्यात आली होती. आता आणखी एक दरवाढ लागू झाल्याने ग्राहकांना मोठा झटका बसला आहे. ताज्या दरवाढीमुळे घरगुती एलपीजीच्या दरात अल्पावधीतच दोनदा वाढ झाली आहे.

स्वयंपाकाचा गॅस हे भारतीय घरांमध्ये सर्वाधिक वापरल्या जाणाऱ्या इंधनांपैकी एक आहे. त्यामुळे वाढत्या किमतींमुळे दैनंदिन गरजांवरील वाढता खर्चामुळे अनेक कुटुंबांवर महागाईचा भार वाढला आहे. इंधन कंपन्यांनी नवीनतम सुधारणेसोबत कोणतेही मोठे सार्वजनिक स्पष्टीकरण दिलेले नाही, परंतु उद्योग मंत्रालयाच्या सूत्रांनुसार या दरवाढीमागे आंतरराष्ट्रीय ऊर्जा बाजारातील घडामोडी हेच मुख्य कारण असल्याचं सांगितलंय.

आंतरराष्ट्रीय ऊर्जा किमती वाढल्या

सूत्रांनुसार, पश्चिम आशियातून होणाऱ्या पुरवठ्यातील व्यत्ययांमुळे आंतरराष्ट्रीय स्तरावर ऊर्जेच्या किमती वाढू लागल्या आहेत. या प्रदेशात सुरू असलेल्या संघर्षामुळे ऊर्जा प्रवाहावर परिणाम झाला आहे. यामुळे आंतरराष्ट्रीय बाजारात इंधनाच्या किमती वाढल्या आहेत. भारत गॅस मोठ्या प्रमाणात आयात करतो, त्यामुळे आंतरराष्ट्रीय किमतींमधील बदलांचा देशांतर्गत इंधन दरांवर अनेकदा परिणाम होतो. आंतरराष्ट्रीय किमती वाढल्यामुळे तेल विपणन कंपन्यांना आयातीचा खर्च आणि भारतातील देशांतर्गत विक्री किमती यांचा ताळमेळ साधण्यासाठी संघर्ष करावा लागतोय.

सूत्रांनी दिलेल्या माहितीनुसार, सरकारी मालकीच्या इंधन विक्रेत्यांना घरगुती एलपीजी विक्रीत मोठा तोटा सहन करावा लागतोय. अंदाजानुसार, कंपन्यांना विकलेल्या प्रत्येक एलपीजी सिलेंडरवर सुमारे ७०३ रुपयांचे नुकसान होत होते. उद्योग मंत्रालयाच्या अधिकाऱ्यांच्या मते, ही नवीनतम दरवाढ त्या भाराचा काही भाग कमी करण्याच्या आणि विक्री किंमती प्रत्यक्ष खर्चाच्या जवळ आणण्याच्या उद्देशाने करण्यात आली आहे. इंधन कंपन्या गेल्या अनेक महिन्यांपासून वाढलेल्या खरेदी खर्चाचा सामना करत आहे. त्यामुळे गॅसची किरकोळ विक्री किंमत कमी ठेवणं कठीण झालं होतं.