Ladki Bahin Yojana: तुमच्या खात्यात जूनच्या हप्त्याचे १५०० रुपये जमा झाले का? आता जुलैचे पैसे कधी मिळणार?

मुख्यमंत्री माझी लाडकी बहीण योजनेच्या लाभार्थी महिलांच्या खात्यात १५ जुलैपासून जून महिन्याचा १५०० रुपयांचा हप्ता जमा व्हायला सुरुवात झाली. राज्य सरकारकडून टप्प्याटप्प्याने पात्र महिलांच्या बँक खात्यात रक्कम पाठवली जाते. पण अनेक महिलांना सध्या फक्त एक महिन्याच्या हप्त्याचा SMS प्राप्त झालेला आहे. तर जुलै महिन्याचा हप्ता अजून जमा झालेला नाही.

यापूर्वी जून आणि जुलै या दोन्ही महिन्यांचे ३००० रुपये एकाच वेळी मिळतील अशी चर्चा होती. पण सध्या फक्त जून महिन्याचे १५०० रुपयेच जमा होत आहेत. सुत्रांनी दिलेल्या माहितीनुसार १५ ऑगस्टआधी जुलै महिन्याचा हप्ता येण्याची शक्यता आहे.

तसेच या योजनेचा लाभ सुरुवातीला अडीच कोटी महिलांना मिळत होता. मात्र पात्रता पडताळणी आणि ई-केवायसी प्रकियेनंतर ९२ लाख महिलांची नावं लाभार्थी यादीतून वगळण्यात आली आहेत. त्यामुळे सध्या जवळपास १.५ कोटी महिलांनाच या योजनेचा लाभ मिळत आहे. ज्या महिलांनी ई-केवायसी पूर्ण केले नाही, किंवा योजनेच्या पात्रता अटी पूर्ण केल्या नाहीत, त्यांची नावे यादीतून काढण्यात आली. तसेच ई-केवायसीतल्या त्रुटींमुळे ६० लाख महिलांना लाभापासून वगळ्यात आलं.

पण पात्र असूनही ज्यांची नावे चुकीने वगळली गेली आहेत, त्यांच्यासाठी दिलासादायक बातमी आहे. महिला व बालविकास विभागाकडून अशा प्रकरणांचे क्रॉस व्हेरिफिकेशन सुरू करण्यात येणार असून पात्र महिलांची नावे पुन्हा योजनेत समाविष्ट करण्याची प्रक्रिया सुरू असल्याची माहिती समोर आली आहे.

तसेच संजय गांधी निराधार योजना आणि मुख्यमंत्री माझी लाडकी बहीण योजना या दोन्ही योजनांसाठी अर्ज करूनही कोणत्याही योजनेचा लाभ न मिळालेल्या महिलांनाही किमान एका योजनेचा लाभ मिळावा, यासाठी राज्य सरकार सकारात्मक विचार करत आहे.