Ladki Bahin Yojana : eKYC करायची कशी? वेबसाइट चालेना, OTP येईना; लाडक्या बहिणींसह भावांचाही थेट मंत्र्यांना सवाल

लाडकी बहीण योजनेत ऑक्टोबरचा हप्ता जमा होण्यास सुरुवात झाली आहे.याबाबत स्वतः महिला व बालविकास मंत्री आदिती तटकरेंनी दिली आहे. याचसोबत लाडक्या बहि‍णींना केवायसी करण्याचेही आवाहन आदिती तटकरेंनी केलं आहे. आता लाडक्या बहि‍णींना १८ नोव्हेंबरपर्यंत केवायसी करायची आहे.

आदिती तटकरेंनी एक्स या प्लॅटफॉर्मवर पोस्ट करत याबाबत घोषणा केली आहे. यामध्ये केवायसी करण्याचे आवाहन केले आहे. परंतु केवायसी करताना अनेक अडचणी येत असल्याची तक्रार महिलांनी केली आहे. महिलांनी सांगितलंय की, केवायसी करताना वेबसाइट लोड होत नाही, ओटीपी येत नाही, आम्ही केवायसी करायची कशी असा प्रश्न त्यांनी सांगितले.

आदिती तटकरेंना सवाल

आदिती तटकरेंनी सोशल मीडियावर पोस्ट केली आहे. त्यावर नागरिकांनी कमेंट्स केली आहे. लाडकी बहीण योजनेची वेबसाइट सध्या सुरु नाही, अनेक अर्जदारांना अडचणी येत आहेत. १८ नोव्हेंबर ही शेवटची तारीख असून हा खूप कमी वेळ आहे. याकडे महिला व बालविकास मंत्री मा. आदिती तटकरेंनी लक्ष द्यावे, अशी कमेंट एकाने केली आहे.

अनेकांनी तर पोस्टखाली कमेंट करत स्क्रिनशॉटदेखील शेअर केले आहेत. लाडकी बहीण योजनेची वेबसाइट लोड होत नसल्याचे दिसत आहे.यामुळे केवायसी करण्यात अडचणी येत असल्याचेही अनेकांनी म्हटले आहे.

एकाने कमेंट करत म्हटलंय की, गेले ५ दिवस मी ट्राय करतोय पण होत नाही, आता ई केवायसी कशी करायची, वेबसाइट ओपन होत नाही. अजून एकाने म्हटलंय की, गेले ७-८ दिवस ई केवायसी करण्याचा प्रयत्न करतोय. साइट हँग झाली आहे का तपासून बघा.