Jio OTT Plans: स्वस्तात धमाल! जिओचे ३ स्वस्त OTT प्लॅन, फक्त १०० रुपयांत ९० दिवस एंटरटेनमेंट

आजच्या डिजिटल युगात प्रेक्षकांना घरी बसून ओटीटी प्लॅटफॉर्मवर चित्रपट आणि वेबसीरिज पाहणे अधिक आवडते. जिओ हॉटस्टार, अमेझॉन प्राइम व्हिडिओ आणि नेटफ्लिक्स यांसारख्या प्लॅटफॉर्मवर कंटेंट पाहण्यासाठी अनेक जण सबस्क्रिप्शन घेतात. मात्र, प्लॅनच्या किंमती जास्त असल्याने अनेक यूजर्स मागे हटतात. याच पार्श्वभूमीवर टेलिकॉम कंपन्यांनी केवळ १०० रुपयांपासून सुरू होणारे असे काही खास रिचार्ज प्लॅन उपलब्ध करून दिले आहेत, ज्यामध्ये डेटा आणि ओटीटी दोन्हीचा फायदा मिळतो.

एअरटेलचा १०० रुपयांचा प्रीपेड प्लॅन यूजर्सना जिओ हॉटस्टारचा ऍक्सेस आणि ५ जीबी हाय स्पीड डेटा देतो. हा प्लॅन ३० दिवसांच्या वैधतेसह उपलब्ध आहे, मात्र यात कॉलिंग आणि एसएमएसचा लाभ मिळत नाही कारण तो फक्त डेटा प्लॅन आहे. दुसरीकडे रिलायन्स जिओचा १०० रुपयांचा प्लॅनही ५ जीबी डेटा देतो, पण त्याची खासियत म्हणजे फक्त १०० रुपयांत ९० दिवसांसाठी जिओ हॉटस्टारचा फायदा. यामुळे यूजर्स मोबाईल, टीव्ही किंवा इतर डिव्हाइसवर तीन महिन्यांसाठी हॉटस्टार पाहू शकतात.

व्होडाफोन आयडियाने (Vi) याच श्रेणीतील प्लॅन १५० रुपयांत उपलब्ध करून दिला आहे. हा प्लॅन एअरटेल आणि जिओपेक्षा महाग असला तरी यूजर्सना ९० दिवसांची वैधता मिळते. यामध्ये ४ जीबी डेटासोबत ९० दिवसांसाठी जिओ हॉटस्टार ऍक्सेस मिळतो.

तथापि, लक्षात ठेवण्यासारखी बाब म्हणजे या प्लॅन्सचा फायदा घेण्यासाठी ग्राहकांच्या नंबरवर आधीपासून प्रायमरी प्लॅन सक्रिय असणे आवश्यक आहे. कारण हे सर्व ओटीटी प्लॅन फक्त डेटा आणि सबस्क्रिप्शनसाठी आहेत, ज्यामध्ये कॉलिंग किंवा एसएमएसचा समावेश नाही.