Infosys -TCS Jobs : सुवर्णसंधी! इन्फोसीस टीसीएससह या आयटी कंपनीत बंपर भरती, ९ लाखांपर्यंत पगार; आताच करा अर्ज

आयटी कंपन्यांमध्ये गेल्या वर्षभरामध्ये मोठी कर्मचारी कपात करण्यात आली होती. आर्थिक मंदीमुळे मोठ-मोठ्या आयटी कंपन्यांनी फ्रेशर्सच्या भरतीवर बंदी घातली होती. पण आता तब्बल वर्षभरानंतर टीसीएस, आयबीएम, इन्फोसिससह जगभरातील मोठ्या आयटी कंपन्यांनी फ्रेशर्ससाठी कॅम्पस प्लेसमेंट भरती (Campus Placements Recruitment 2024) सुरू केली आहे. त्यामुळे नोकरीच्या शोधामध्ये असणाऱ्या तरुणांसाठी ही सुवर्णसंधी आहे.

बिझनेस टुडेच्या रिपोर्टनुसार, Infosys, TCS, IBM, Wipro आणि LTIMindtree यासारख्या मोठ्या आयटी कंपन्यांनी प्लेसमेंटच्या सुरूवातीच्या टप्प्यासाठी कॅम्पसला भेटी देण्यास सुरूवात केली आहे. पण यावेळी निवड प्रक्रिया खूपच वेगळी असणार आहे. ज्या कंपन्या आतापर्यंत भरपूर नोकऱ्या देत होत्या त्या आता निवडक उमेदवारांनाच निवडतील. त्यांना क्लाउड कॉम्प्युटिंग, डेटा ॲनालिटिक्स आणि आर्टिफिशियल इंटेलिजन्सचे ज्ञान असलेल्या लोकांची गरज आहे. अशा या पदांसाठी वेतन पॅकेजही ६ ते ९ लाख रुपयांपर्यंत असणार आहे.

देशातील कॅम्पस प्लेसमेंट्सच्या प्रक्रियेला जुलैपासून सुरुवात झाली. याशिवाय ऑफ कॅम्पस जॉइनिंगही केले जाणार आहे. याद्वारे TCS ने सुमारे ४० हजार फ्रेशर्स, इन्फोसिस २० हजार आणि विप्रो १० हजार फ्रेशर्स घेण्याचा प्लान आखला आहे. विप्रोचे एचआर प्रमुख सौरभ गोविल यांनी सांगितले की, आम्ही एका वर्षाच्या विश्रांतीनंतर पुन्हा कॅम्पस हायरिंग सुरू करणार आहोत. यावेळी कट ऑफ ६० टक्क्यांवरून ७० टक्क्यांपर्यंत वाढण्याची शक्यता आहे. TOI अहवालानुसार, FY24 मध्ये २०२३-२४ आर्थिक वर्षात Infosys कडे ११,९०० कॅम्पस भरती होती जी ५०,००० फ्रेशर्सच्या तुलनेत ७६ टक्क्यांनी घसरली आहे.

या कॅम्पस हायरिंगमध्ये कंपन्या उमेदवारांचे शिक्षण, कौशल्ये, प्रमाणपत्रे तसेच सोशल मीडिया प्रोफाइलवर बारीक नजर ठेवणार आहेत. या माध्यमातून कंपन्यांना तुमची संपूर्ण पार्श्वभूमी समजून घ्यायची आहे. अशा परिस्थितीत इंजिनिअरिंगची पदवी घेतलेल्या तरुणांसाठी सुवर्णसंधी असणार आहे. नोकरीच्या संधी शोधणाऱ्यांनी आताच मुलाखतीची व्यवस्थित तयारी करून सज्ज राहावे.