Success Story: लेकीला खाकी वर्दीत पाहायचं स्वप्न, दुसऱ्या प्रयत्नात क्रॅक केली UPSC; वडिलांसाठी पूजा अवाना झाल्या IPS

यूपीएससी (UPSC) परीक्षा पास करण्याचे लाखो तरुणांचे स्वप्न असते. स्पर्धा परीक्षा पास करण्यासाठी खूप मेहनत घ्यावी लागते. दिवसरात्र एक करुन अभ्यास करावा लागतो. असंच काहीसं पूजा अवाना यांनी केलं. त्या आज आयपीएस अधिकारी म्हणून कार्यरत आहेत. पूजा अवाना यांचा प्रवास सर्वांसाठीच प्रेरणादायी आहे.

आयपीएस पूजा अवाना (IPS Pooja Awana) या मूळच्या नोएडाच्या रहिवासी आहेत. त्या नेहमीच परीक्षेत अव्वल होत्या. शाळेत नेहमी टॉप करायच्या. त्यांनी लहानपणीच प्रशासकीय सेवेत रुजू होण्याचे ठरवले होते. त्यांच्या वडिलांचे स्वप्न होते की, लेकीला पोलिसाच्या वर्दीत पाहायचं. हेच स्वप्न पूर्ण करण्यासाठी पूजा या आयपीएस अधिकारी झाल्या.

पूजा अवाना यांनादेखील अपयशाचा सामना करावा लागला. अपयशामुळे किंवा कमी गुण मिळाल्याने निराश होऊ नका. आपले लक्ष्य गाठण्यासाठी प्रयत्न करा. एकदा नाही तर दुसऱ्यांदा नक्कीच यश मिळेल, असं पूजा सांगतात. त्यामुळेच अपयशाला कधीच घाबरु नका.

पूजा यांनादेखील पहिल्या प्रयत्नात यश मिळाले नाही. परंतु पहिल्यांदा अपयश मिळाल्याने पूजा यांनी हिम्मत सोडली नाही. त्यांनी दुसऱ्या प्रयत्नात ३१६ रँक प्राप्त केली. त्यांचा हा प्रवास खूपच खडतर होता. त्या २०१२ च्या बॅचच्या आयपीएस अधिकारी आहेत.

पूजा यांनी स्पर्धा परीक्षेच्या विद्यार्थ्यांना सल्ला दिला आहे की, तुम्ही तुमची ताकद आणि कमजोरी काय आहे ते शोधा. त्यानंतर आपल्या क्षमतेनुसार विषय निवडा. यानंतर अभ्यास करायला सुरुवात करा. त्यानंतर तुम्हाला नक्कीच यश मिळणार.