EPFO कार्यालयाच्या चकरा मारण्याची गरज नाय; नव्या अ‍ॅपद्वारे निघेल पीएफचा पैसा

कर्मचारी भविष्य निर्वाह निधी संघटना (EPFO) त्यांच्या लाखो सदस्यांसाठी खास सुविधा सुरू करणार आहे. यामुळे पीएफओ सदस्यांचं एक चिंता मिटणार आहे. EPFO ​​ऑनलाइन सेवांना हायटेक बनवत आहे, त्यात UPI पेमेंट गेटवेद्वारेच सदस्यांना पीएफचा पैसा काढता येणार आहे. यासाठी विभाग या वर्षी एप्रिलमध्ये एक नवीन मोबाइल अ‍ॅप लाँन्च करणार आहे. या नवीन वैशिष्ट्यामुळे कर्मचाऱ्यांना त्यांचे पीएफ निधी त्यांच्या बँक खात्यात हस्तांतरित होण्यासाठी जास्त वेळ वाट पाहावी लागणार नाही.

"EPFO 3.0" नावाच्या EPFO ​​सुधारणांच्या तिसऱ्या टप्प्यासह ही सेवा पूर्णपणे सक्रिय होईल. कामगार मंत्रालयाच्या सूत्रांनी दिलेल्या माहितीनुसार, हे नवीन मोबाइल अ‍ॅप आणि UPI या प्रणालीच्या चाचण्या आधीच सुरू झाल्या आहेत. सध्या एप्रिलमध्ये लाँन्च झाल्यावर कोणत्याही तांत्रिक अडचणी येऊ नयेत यासाठी १०० हून अधिक डमी खात्यांसह या तंत्रज्ञानाची चाचणी घेतली जातेय. हे पाऊल डिजिटल इंडियाच्या दिशेकडे जाणार मोठं पाऊल समजलं जाणार आहे.

पैसे काढण्याची मर्यादा आणि नवीन नियम

UPI पैसे काढल्यानंतरही काही नियमांचे पालन करणे आवश्यक आहे. नवीन कामगार संहितेनुसार, एकूण EPF खात्यातील शिल्लक रकमेपैकी किमान २५ टक्के रक्कम गोठवली जाईल. खातेधारकांना त्यांच्या उर्वरित रकमेतून गरजेनुसारच पैसे काढता येतील. नवीन मोबाइल अ‍ॅप केवळ पैसे काढण्याची परवानगी देणार नाही तर त्यांना त्यांचे पासबुक बॅलन्स तपासण्याची आणि इतर आवश्यक सेवांमध्ये प्रवेश करण्याची परवानगी देणार.

नवीन मोबाईल अॅप लाँच झाल्यानंतरही सध्याच्या UAN नंबर आणि उमंग पोर्टल सेवा चालू राहतील. सध्या पीएफ काढण्याच्या प्रक्रियेला बराच वेळ लागतो, परंतु ऑटो-सेटलमेंट मोडमध्ये अर्ज केल्यानंतर तीन दिवसांच्या आत सेटलमेंट पूर्ण होत असते. नुकतेच ईपीएफओने ऑटो-सेटलमेंट मर्यादा १ लाख रुपयांवरून ५ लाख रुपये केली आहे.