SIR Update : निवडणूक आयोगाचा मोठा निर्णय! SIR प्रक्रियेसाठी मुदतवाढ; नागरिकांना दिलासा

राज्यात सुरू असलेल्या मतदार याद्यांच्या विशेष सखोल पुनरीक्षण (SIR) प्रक्रियेला निवडणूक आयोगाने मुदतवाढ दिली असून, यामुळे अद्याप मतदार यादीत नाव नोंदवता न आलेल्या नागरिकांना मोठा दिलासा मिळाला आहे. सुधारित वेळापत्रकानुसार, बूथ लेव्हल अधिकारी (BLO) यांची घराघरांत जाऊन पडताळणी करण्याची मोहीम आता १७ ऑगस्ट २०२६ पर्यंत सुरू राहणार आहे. त्यामुळे नवीन मतदार नोंदणी तसेच मतदार यादीतील त्रुटी दुरुस्त करण्यासाठी नागरिकांना अतिरिक्त वेळ मिळणार आहे.

निवडणूक आयोगाने पूर्वी जाहीर केलेल्या नियोजनात बदल करत नवीन वेळापत्रक प्रसिद्ध केले आहे. त्यानुसार १७ ऑगस्ट रोजी मतदान केंद्रांचे पुनर्गठन करण्यात येईल. त्यानंतर २४ ऑगस्ट २०२६ रोजी प्रारूप मतदार यादी प्रसिद्ध केली जाईल. या यादीवर हरकती किंवा दावे सादर करण्यासाठी नागरिकांना २४ ऑगस्ट ते २३ सप्टेंबर हा कालावधी उपलब्ध असेल.

या कालावधीत प्राप्त होणाऱ्या सर्व अर्जांची छाननी, सुनावणी आणि त्यावरील निर्णय २२ ऑक्टोबरपर्यंत पूर्ण करण्यात येणार आहे. त्यानंतर आवश्यक दुरुस्त्या करून २७ ऑक्टोबर २०२६ रोजी अंतिम मतदार यादी प्रकाशित केली जाईल. दरम्यान, ज्यांचे नाव अद्याप मतदार यादीत समाविष्ट झालेले नाही किंवा नाव, पत्ता, जन्मतारीख अथवा इतर तपशीलांमध्ये बदल करायचा आहे, त्यांनी या मुदतवाढीचा लाभ घेत वेळेत अर्ज करण्याचे आवाहन आयोगाने केले आहे.

तसेच मतदार नोंदणी, दुरुस्ती किंवा नाव वगळण्यासाठी अर्ज करताना चुकीची माहिती देणे किंवा खोटी घोषणा करणे हा कायद्याने गुन्हा असल्याचा इशाराही आयोगाने दिला आहे. त्यामुळे सर्व नागरिकांनी आवश्यक कागदपत्रांसह अचूक माहिती सादर करून आपले मतदानाचे अधिकार सुरक्षित ठेवावेत, असे आवाहन करण्यात आले आहे.