ED Raid : अंबानींच्या घरी ईडीची धाड, ३००० कोटींच्या घोटाळ्याची चौकशी, ३५ पेक्षा जास्त ठिकाणी छापा

ED raids Anil Ambani companies in ₹3000 crore Yes Bank fraud : अनिल अंबानी यांच्या कंपन्यांवर ईडीकडून छापेमारी करण्यात आली आहे. ३,००० कोटी रूपयांच्या कथित बँक कर्ज घोटाळ्याची चौकशीसाठी ईडीने ३५ हून अधिक ठिकाणांवर छापेमारी केली. ही कारवाई मनी लाँड्रिंग प्रकरणात आणि येस बँकेकडून २०१७ ते २०१९ दरम्यान मंजूर झालेल्या सुमारे ३,००० कोटी रुपयांच्या कर्जातील कथित अनियमिततांच्या चौकशीसाठी करण्यात आली. ईडीमधील सूत्रांनी दिलेल्या माहितीनुसार, ही छापेमारी दिल्ली आणि मुंबईत ५० हून अधिक कंपन्या आणि २५ व्यक्तींशी संबंधित परिसरात झाल्या. केंद्रीय अन्वेषण ब्युरो (सीबीआय)ने दाखल केलेल्या दोन एफआयआरच्या आधारे कारवाई सुरू आहे.

येस बँकेने RAAGA कंपन्यांना मोठ्या प्रमाणात असुरक्षित कर्जे दिली होती. त्यामध्ये कर्ज मंजूरीसाठी बँक अधिकाऱ्यांना लाच देण्याचा आणि कर्जाची रक्कम शेल कंपन्यांमध्ये वळवण्याचा संशय आहे. येस बँकेच्या माजी प्रवर्तकांसह वरिष्ठ अधिकाऱ्यांनी कर्ज मंजूरीपूर्वी त्यांच्या खासगी खात्यांमध्ये पैसे घेतल्याचे पुरावे ईडीला मिळाले. याशिवाय, कर्ज मंजूरीसाठी बनावट कागदपत्रे, बिन विश्लेषणाचे क्रेडिट प्रस्ताव आणि "लोन एव्हरग्रीनिंग" सारख्या अनियमितता आढळल्या आहेत.

दुसरीकडे, स्टेट बँक ऑफ इंडियाने (एसबीआय) रिलायन्स कम्युनिकेशन्स (RCom) आणि अनिल अंबानी यांना "फसवणूक" खाते म्हणून बाजूला केले आहे. एसबीआयने जून २०२५ मध्ये ही कारवाई केली आणि सीबीआयकडे तक्रार दाखल करण्याची प्रक्रिया सुरू आहे. रिलायन्स होम फायनान्स लिमिटेडच्या कर्ज पुस्तकातही अनियमितता आढळल्याची माहिती सेबीने ईडीला दिली. ही कारवाई मनी लाँड्रिंग प्रतिबंधक कायद्याअंतर्गत (PMLA) होत आहे. बँक, गुंतवणूकदार आणि सार्वजनिक संस्थांचा पैसा हडपण्याचा "नियोजित डाव" असल्याचे ईडीचे म्हणणे आहे.