DA Hike: दिवाळीपूर्वी केंद्रीय कर्मचाऱ्यांना मोठं गिफ्ट! ऑक्टोबरचा पगार किती रुपयांनी वाढणार? जाणून घ्या

केंद्रीय सरकारी कर्मचारी आणि पेन्शनधारकांसाठी महागाई भत्याबद्दल (DA Hike) महत्त्वाची अपडेट समोर आलेली आहे. जुलै २०२६ पासून लागू होणाऱ्या महागाई भत्त्यामध्ये ३ टक्के वाढ होण्याची शक्यता व्यक्त केली जातेय. ही वाढ मंजूर झाल्यावर सध्या ६० टक्के असलेला महागाई भत्ता ६३ टक्क्यांवर पोहोचू शकतो. मात्र, याबद्दल केंद्र सरकारची अधिकृत घोषणा होणं अजून बाकी आहे.

दिवाळीआधी DA वाढीची घोषणा होणार?

यंदा ८ नोव्हेंबरला दिवाळी साजरी होणार आहे. त्यामुळे केंद्रीय कर्मचारी संघटनांकडून दिवाळीआधी महागाई भत्ता आणि महागाई सवलतीची (DR) थकबाकी जाहीर करण्याची मागणी केली जातेय. १४ ऑक्टोबर रोजी कॉन्फेडरेशन ऑफ सेंट्रल गव्हर्नमेंट एम्प्लॉईज अँड वर्कर्सने कॅबिनेट सचिवांना पत्र लिहून प्रलंबित DA/DR आणि दिवाळीचा बोनसच्या मागणीसाठी आंदोलनाचं आवाहन केलं होतं.

दरम्यान, गैर - राजपत्रित कर्मचार्‍यांसाठी ३० दिवसांच्या सॅलरीइतका बोनस, ₹६,९०८ पर्यंत, तसेच ११.४ लाखांहून जास्त रेल्वे कर्मचाऱ्यांसाठी ७८ दिवसांचा उत्पादकता संलग्न बोनस (PLB), ₹१७,९५१ पर्यंत, जाहीर झाल्याचं वृत्त आहे. मात्र बोनस आणि DA वाढ या दोन वेगळ्या बाबी आहेत.

३ टक्के DA वाढल्यास पगार किती वाढेल?

महागाई भत्त्याची गणना मूळ सॅलरीवर केली जाते. DA ६० टक्क्यांवरून ६३ टक्के झाल्यावर संभाव्य वाढ पुढीलप्रमाणे असेल.

१८,००० बेसिक सॅलरी : दरमहा ₹५४०, वर्षाला ₹६,४८०

२५,५०० बेसिक सॅलरी: दरमहा ₹७६५, वर्षाला ₹९,१८०

३५,४०० बेसिक सॅलरी : दरमहा ₹१,०६२, वर्षाला ₹१२,७४४

४४,९०० बेसिक सॅलरी : दरमहा ₹१,३४७, वर्षाला ₹१६,१६४

५६,१०० बेसिक सॅलरी : दरमहा ₹१,६८३, वर्षाला ₹२०,१९६

हे कॅलक्युलेशन ३ टक्क्यांच्या वाढीवर आधारित आहे. प्रत्यक्ष पगारातला बदल लागू नियम आणि इतर सॅलरी घटकांनुसार वेगळा असू शकतो.

थकबाकी आणि आठव्या वेतन आयोगाचं काय होणार?

DA वाढ १ जुलै २०२६ पासून लागू झाल्यास, मंजुरीनंतर पात्र कर्मचाऱ्यांना मागील महिन्यांची थकबाकी मिळू शकते. उदाहरणार्थ १८,००० बेसिक सॅलरी असलेल्या कर्मचाऱ्याला जुलै ते सप्टेंबर या तीन महिन्यांची संभाव्य थकबाकी १,६२० होईल.

आठवा वेतन आयोग हा DA वाढीपासून वेगळा विषय आहे. उपलब्ध माहितीनुसार, आयोगाला अहवाल सादर करण्यासाठी १८ महिन्यांचा कालावधी देण्यात आला आहे. २१ ऑक्टोबरच्या केंद्रीय मंत्रिमंडळ बैठकीत DA वाढीबाबत निर्णय होईल का, याकडे कर्मचाऱ्यांचं लक्ष लागलं आहे.