IDBI बँकेबाबत केंद्र सरकारचा मोठा निर्णय; बँकेतील हिस्सेदारी विकणार,कोणत्या कंपनीसोबत झाला 52,877 कोटींचा करार?

आयडीबीआय बँकेतील एकूण मालकीपैकी भारत सरकार ३०.४८ टक्के तर एलआयसी ३०.२४ टक्के विकणार आहे. या विक्रीनंतर आता आयडीबीआय बँकेत भारत सरकारची हिस्सेदारी फक्त १५ टक्के राहील. तर एलआयसीची हिस्सेदारी ही १९ टक्क्यांपर्यंत कमी होणार आहे. एअर इंडियाच्या खासगीकरणानंतर सरकारने बँकेच्या खासगीकरणाचा हा घेतलेला सर्वात मोठा दुसरा निर्णय आहे. फेअरफॅक्स फायनान्शियलद्वारे आयडीबीआय बँकेतील हिस्सेदारी खरेदी करणे हा भारतातील वित्तीय सेवा क्षेत्रातील आतापर्यंतची सर्वात मोठी परकीय गुंतवणूक ठरणार आहे.

दरम्यान, २०२२ सालापासूनच आयडीबीआय बँकेतील आपला हिस्सा विकण्याचा सरकारचा विचार होती. त्यासाठीची योजनाही तयार करण्यात आली होती. परंतु कायदेशीर मान्यता तसेच इतर प्रक्रिया पूर्ण झाली नव्हती. मार्च महिन्यात बँकेतील हिस्सेदारी विकण्यासाठी निविदा काढण्यात आली होती. परंतु बोली कमी मिळाल्याने ही प्रक्रिया तात्पुरती स्थगित करण्यात आली होती.

सरकारने आपला हिस्सा विकण्याचा निर्णय घेतल्यानंतर ग्राहकांना केंद्रस्थानी ठेवून महत्त्वाचा धोरण ठरवण्यात आले आहे. ग्राहकांचा बँकेवरील विश्वास कायम राहावा यासाठी बँकेचे नाव बदलले जाणार नाही. फेअरफॅक्स फायनान्शियल होल्डिंग्स या कंपनीने केलेल्या गुंतवणुकीला तीन वर्षाचा लॉक इन पिरियड असणार आहे. म्हणजेच गुंतवणूकदार तीन वर्षांपर्यंत आपले शेअर हे खुल्या बजारात विकू शकणार नाहीत.