शहरातील रस्त्यांवर नेहमीच काही ना काही हटके पाहायला मिळतं. भोपाळमधील एअरपोर्ट रोडवर घडलेली एक भन्नाट घटना सध्या सोशल मीडियावर तुफान व्हायरल होत आहे. यावेळी दिसलेलं दृश्य मात्र सगळ्यांनाच आश्चर्यचकित करून गेलं आहे. एका स्कुटीच्या डिक्कीमध्ये २ शेळ्या बसलेल्या पाहायला मिळाल्या. हा व्हिडिओ सध्या चर्चेचा विषय ठरला आहे.

व्हायरल झालेल्या व्हिडिओमध्ये, एक तरुण आपली इलेक्ट्रिक स्कूटर अगदी आरामात चालवत होता. सुरुवातीला आजूबाजूने जाणाऱ्यांना त्याच्या स्कूटरची डिकी उघडी असल्याचं दिसलं. पण जसं कॅमेरा जवळ गेला, तसं दृश्य पाहून सगळेच थक्क झाले. त्या स्कूटरच्या डिक्कीत दोन लहान बकऱ्या अगदी आरामात बसलेल्या होत्या. या बकऱ्या अगदी शांतपणे प्रवासाचा आनंद घेत असल्यासारख्या दिसत होत्या. जणू काही त्या एखाद्या महागड्या गाडीच्या सनरूफमधून बाहेर डोकावत आहेत, असं दृश्य होतं. हा सगळा प्रकार कॅमेऱ्यात कैद करणाऱ्या व्यक्तीलाही आपलं हसू आवरता आलं नाही.

हा व्हिडिओ सोशल मीडियावर ‘भैयाजींचा जुगाड’ या नावाने जोरदार व्हायरल होत आहे. अनेकांनी यावर मजेशीर प्रतिक्रिया देत कंपनीला टॅग केलं आहे. “हेल्मेट ठेवायला जागा दिली होती, पण भोपाळकरांनी ती बकऱ्यांच्या पिलांसाठी वापरली,” अशा कमेंट्स सध्या मोठ्या प्रमाणात पाहायला मिळत आहेत. तथापि, या व्हिडिओवर काही जणांनी चिंता व्यक्त केली आहे. त्यांच्या मते, अशा प्रकारे प्राण्यांना वाहून नेणे धोकादायक ठरू शकते.

अचानक ब्रेक लागल्यास किंवा अपघात झाल्यास बकऱ्यांना इजा होण्याची शक्यता नाकारता येत नाही. एकीकडे लोक या व्हिडिओवर खळखळून हसत असले, तरी दुसरीकडे सुरक्षिततेचा मुद्दाही तितकाच महत्त्वाचा आहे. मात्र, भोपाळकरांची कल्पकता आणि हटके शैली पुन्हा एकदा या व्हिडिओमुळे चर्चेत आली आहे. त्यामुळे हा व्हिडिओ सोशल मीडियावर सध्या जोरदार ट्रेंड करताना दिसत आहे.