FDAची मोठी कारवाई; ऐन सणासुदीच्या काळात पुण्यात १० टन पनीर, खवा जप्त

कर्नाटकातून पुण्यात आणण्यात आलेले पनीर आणि खवा यांच्यावर अन्न व औषध प्रशासनाने सोमवारी धडक कारवाई केली. या कारवाईत एकूण १० हजार ८८८ किलो खाद्यपदार्थ जप्त करण्यात आले. या साठ्याची किंमत ३१ लाख ६ हजार ६८० रुपये आहे.

अन्न सुरक्षा आयुक्त तुकाराम मुंढे यांच्या मार्गदर्शनाखाली बावधन, कसबा पेठ आणि बिबवेवाडी परिसरात ही कारवाई करण्यात आली. यामध्ये तीन वाहनांतून आणलेले सुमारे १० हजार १६८ किलो पनीर आणि कसबा पेठेतील डगळे पूल परिसरातील शिवशंकर डेअरीमधील ७२० किलो खवा आढळला.

पनीर आणि खव्याची वाहतूक व साठवणूक अयोग्य तापमानात तसेच अस्वच्छ वातावरणात होत असल्याचे आढळले. हे पदार्थ मानवी सेवनासाठी असुरक्षित असल्याच्या संशयावरून जप्त करून नष्ट करण्यात आले. ग्राहकांनी तक्रारींसाठी १८००२२२३६५ या टोल फ्री क्रमांकावर संपर्क साधावा, असे आवाहन प्रशासनाने केले आहे.