उत्तराखंडमधील उत्तरकाशीमध्ये ढगफुटीचा आणखी एक व्हिडिओ समोर आला आहे. यात एक माणूस चिखलाच्या ढिगाऱ्यातून 'जिवंत' बाहेर येताना दिसतोय. याला काही जण लक म्हणत आहेत, तर काही जण चमत्कार म्हणत आहेत. ढग फुटी झाल्यानंतर झालेल्या भूस्खलनामुळे हर्षिल दरीजवळील धाराली गाव उद्ध्वस्त झाले. संपूर्ण गाव मातीच्या ढिगाऱ्याखाली गाडले गेले. यात ५० हून अधिक लोक ढिगाऱ्याखाली गाडले गेल्याची भीती आहे.

याच भीतीदरम्यान एका आशादायक व्हिडिओ समोर आलाय. एक माणूस मातीच्या ढिगाऱ्यातून रेंगत रेंगत बाहेर येतो. सरकत सरकत तो चिखलातून बाहेर येत असल्याचं व्हिडिओमध्ये दिसत आहे. तिथे उभे असलेले काही लोक त्याला प्रोत्साहन देत आहेत. त्याचा आत्मविश्वास वाढवत होती. डोंगराचा काही भाग कोसळल्यानं गावातील सर्व घरे पत्त्यांसारखी कोसळली. या भूस्खलनात ५० पेक्षा जास्त लोक बेपत्ता आहेत, तर ५ जणांचा मृत्यू झाल्याची माहिती समोर आलीय. पण त्यापेक्षा जास्त लोकांचा मृत्यू झाला असावा, अशी भिती व्यक्त केली जात आहे.

उत्तराखंडमधील उत्तरकाशी जिल्ह्यातील गंगोत्री धामच्या आधी असलेल्या हर्षिल खोऱ्याजवळ धाराली गाव आहे. या गावावर ढगफुटी झाली. त्यानंतर भूस्खलन झालं. डोंगराचा काही भाग घसरला, ज्यामुळे धाराली गावातील घरे मातीच्या ढिगाऱ्याखाली गाडल्या गेली. आपत्तीस्थळी एसडीआरएफ, एनडीआरएफ, आयटीबीपी, पोलिस, लष्कर आणि जिल्हा प्रशासनाच्या तुकड्या बचावकार्यात गुंतल्या आहेत. मुख्यमंत्री पुष्कर सिंह धामी आणि केंद्रीय गृहमंत्री अमित शहा खोऱ्यातील परिस्थितीवर लक्ष ठेवून आहेत. पंतप्रधान मोदींनी आपत्तीबद्दल दुःख व्यक्त केले आहे