वाहन चालवताना हेल्मेट वापरा, सुरक्षित राहा असा संदेश नेहमी दिला जातो. मात्र अनेक वाहनचालक विना हेल्मेट गाडी चालवताना दिसतात. हेल्मेटबाबत जनजागृती करण्यासाठी पोलिसांकडूनही अनेक उपक्रम राबवले जातात. सध्या पुण्यातील असाच एक हेल्मेट वापरण्याचे आवाहन करणाऱ्या बॅनरने सर्वांचेच लक्ष वेधले आहे. हेल्मेटबाबत जनजागृतीची ही भन्नाट आयडिया पाहून तुम्हीही थक्क व्हाल.

'पुणे तिथे काय उणे', असं म्हणतात ते उगाच नाही. पुणेरी पाट्या, पुणेकरांचे टोमणे, पुणेकरांची भाषा याबाबत नेहमीच चर्चा होत असते. मोजक्या शब्दात पानउतारा करण्याबाबत त्यांचा हात कोणीच धरु शकत नाही. ज्याचे अनेक किस्से, गमतीजमती तुम्ही ऐकल्या असतील. सध्या पुणे शहरातील वाहतूक पोलिसांनीही असाच एक बॅनर लावत वाहन चालकांना संदेश दिला आहे.

या पोस्टरचे वैशिष्ट्य म्हणजे त्याच्यावर लिहलेला मजकूर. या बॅनरवर बाहुबलीचा फोटो लावण्यात आला आहे. तसेच त्याच्यासोबत बाहुबली जर हेल्मेट घालत असेल तर आपण का लाजतो? हेल्मेट वापरा सुरक्षित राहा,' असा संदेश लिहला आहे. हा हटके बॅनर येणा- जाणाऱ्या वाहन चालकांचे लक्ष वेधून घेत आहे.

शिवाजीनगर वाहतूक विभागाकडून हा बॅनर लावण्यात आला आहे. पुणेरी गाईड या पेजवर शेअर करण्यात आलेला हा फोटो सध्या नेटकऱ्यांचे लक्ष वेधते आहे. या फोटोवर कमेंट्स करत अनेकांनी या अनोख्या बॅनरचे कौतुक केले आहे. तसेच अनेकांनी हा संदेश मनावर घेऊन हेल्मेट वापरण्याचे आवाहनही केले आहे.