रविवारी रात्री टीम इंडियाने न्यूझीलंडचा पराभव करत टी-२० वर्ल्डकपवर नाव कोरलं. संपूर्ण देशभर या विजयाचा जल्लोष करण्यात येतोय. अशातच एक व्हिडीओ सोशल मीडियावर व्हायरल होतोय. या व्हिडिओमध्ये पाकिस्तानातील एका कुटुंबाने भारताच्या विजयाचा आनंद साजरा करत केक कापल्याचं पाहायला मिळतंय.

कुटुंबातील सदस्य आनंदाने टाळ्या वाजवत आणि हसत हा भारताचा आनंदाचा साजरा करताना दिसतायत. भारत-पाकिस्तान क्रिकेट सामना हा जगातील हायव्होल्टेज सामना मानला जातो. त्यामुळे हा व्हिडिओ अनेकांसाठी आश्चर्याचा धक्का बसला आहे.

सोशल मीडियावर व्हिडीओ व्हायरल

व्हिडिओमध्ये दिसणाऱ्या या कुटुंबाने भारताच्या टी-२० वर्ल्डकपचा विजयाचा आनंद आपल्या घरात केक कापून साजरा केला. घरातील सदस्यांनी एकत्र जमून हा जल्लोष केला. यावेळी टाळ्या वाजवल्या आणि एकमेकांचं अभिनंदनही केलं. हा छोटासा क्षण कॅमेऱ्यात कैद झाला आणि काही तासांतच सोशल मीडियावर मोठ्या प्रमाणात शेअर होऊ लागला.

भारत आणि पाकिस्तान यांच्यातील क्रिकेट सामने नेहमीच तणावपूर्ण परिस्थितीत होतात. दोन्ही देशांतील चाहत्यांसाठी हा सामना केवळ खेळ नसून प्रतिष्ठेचा विषय मानला जातो. अशा पार्श्वभूमीवर पाकिस्तानातील एका कुटुंबाने भारताच्या विजयाचा आनंद साजरा केल्याचा हा प्रसंग अनेकांच्या नजरा वेधून घेतोय.

सोशल मीडियावर विविध प्रतिक्रिया

सोशल मीडियावर या व्हिडिओवर मोठ्या प्रमाणात कमेंट केल्या जातायत. अनेक युजरने हा प्रसंग क्रिकेटच्या सामर्थ्याचं उदाहरण असल्याचं म्हटलंय. काहींनी कमेंट करत म्हटलंय की, 'क्रिकेट लोकांना एकत्र आणण्याची ताकद ठेवतं.' तर काहींनी 'हा खूप सुंदर आणि छान क्षण आहे,” अशा शब्दात या कुटुंबाचं कौतुक केलंय.