Viral : एका तरुणाने त्याच्या काकीशी लग्न केले आहे. त्यांनी पोलीस ठाण्यामध्ये पोलिसांच्या उपस्थितीत विवाह पार पडला. ही घटना उत्तर प्रदेशमध्ये घडली आहे. या घटनेचा व्हिडीओ सोशल मीडियावर प्रचंड व्हायरल होत आहे. तरुणाच्या काकाने 'मी सर्वस्व गमावले आहे, माझ्याकडे काहीही शिल्लक राहिले नाहीये', असे म्हटले आहे. 'हा माझा पुतण्या आहे, तो माझ्या मोठ्या भावाचा मुलगा आहे. पटवाई पोलीस ठाण्यात दबावाखाली हे लग्न झाले आहे. तिने (तरुणाच्या काकीने) स्वत:च्या मर्जीने लग्न केले आहे. आता तिने तिथेच राहावे अशी माझी इच्छा आहे. जर तिला काही झाले, तर त्यात मला ओढू नका', असेही तरुणाच्या काकाने म्हटले आहे.

उत्तर प्रदेशातील रामपूर जिल्ह्यातील पटवाई पोलीस ठाण्याच्या हद्दीतील एका गावात ही घटना घडली आहे. एका तरुणाचे त्याच्या काकीशी प्रेमसंबंध होते. तिला भेटण्यासाठी हा तरुण घराच्या भिंतीवरुन उडी मारत येत असे. त्याच्या काकाला याची माहिती नव्हती. पण हळूहळू गावात ही बातमी वाऱ्यासारखी पसरली. प्रेमप्रकरणाची माहिती तरुणाच्या काकाला समजली. जाब विचारताच मला पुतण्यासोबत राहायचे आहे, असे तरुणाच्या काकीने म्हटले.

प्रेमसंबंधांमुळे कुटुंबाला धक्का बसला. तरुणाच्या काकीने पोलीस ठाण्यात पुतण्याविरुद्ध गुन्हा दाखल केला. 'माझ्याशी लग्न केलं नाही, तर तुरुंगात जाशील' अशी पुतण्याला धमकीही दिली. त्यानंतर पोलिसांनी पुतण्याला पोलीस ठाण्यात बोलावले. पोलिसांनी पुतण्याला तिच्या गळ्यात हार घालायला आणि कूंकू लावायला सांगितले. घटस्फोट न घेता काकीने पुतण्याशी लग्न केले.

'३ वर्षांपासून त्यांचे प्रेमसंबंध सुरु होते. याची मला माहिती नव्हती. मी गाडी चालवतो, माझा पुतण्याही गाडी चालवतो. ते दोघे एकमेकांशी गुपचूप बोलत राहिले. जेव्हा हे सर्वांसमोर आले, तेव्हा माझी पत्नी म्हणाली तिला पुतण्यासोबत राहायचे आहे. तो भिंतीवरुन उडी मारुन तिला भेटायला यायचा. त्याला शेजाऱ्यांनी पाहिले होते. हे प्रकरण पोलीस ठाण्यात पोहोचले. माझ्या पत्नीने पुतण्यासह कुटुंबातील सहा सदस्यांच्या विरोधात गुन्हा दाखल केले', असे तरुणाच्या काकाने म्हटले.