उत्तरप्रदेशच्या झांसी येथे एका पाळीव पिटबुल कुत्र्‍याने हल्ला केल्याचा व्हिडीओ समोर आला आहे. कुत्र्‍याने एका महिलेवर हल्ला केला आहे. महिलेचा हात कुत्र्‍याने जबड्यात धरला आणि तिला खाली फेकून दिले. महिलेने आरडा- ओरडा केल्यानंतर घरमालक आणि स्थानिक लोकांच्या मदतीने महिला थोडक्यात बचावली आहे . बऱ्याच वेळच्या संघर्षानंतर महिलेला कुत्र्याच्या तावडीतून सोडवण्यात यश आलं आहे. सध्या सोशल मीडियावर या घटनेचा व्हिडीओ व्हायरल होत आहे.

पाळीव प्राणी हे जितकेच प्रेमळ असतात तितकेच हिसंक असतात. अनेकदा पाळीव प्राण्याच्या हल्ल्याच्या घटना घडल्या आहेत. पाळीव प्राण्यांनी मानवी वस्तीवर हल्ला केला आहे. अशातच नुकत्याच घडलेल्या या घटनेत महिला देखील गंभीररित्या जखमी झाली आहे.

शनिवारी रात्रीच्या सुमारास एक महिला आपल्या मैत्रिणीकडे आली. मात्र बाहेर जात असताना अचानक पाळीव पिटबुल कुत्र्‍याने तिच्यावर हल्ला केला ज्यामुळे ती गंभीर जखमी झाली आहे. महिलेने आरडा ओरड केल्यानंतर तेथे घरमालक आणि बरेच लोक जमले आहेत. तरीही कुत्रा घाबरला नाही त्या महिलेला वाचवण्यासाठी आलेल्या घरमालकाच्या मुलीवर देखील कुत्र्याने हल्ला केला आहे.

व्हायरल व्हिडीओमध्ये तुम्ही पाहू शकता, की एका कुत्र्‍याने एका महिलेचा पाठलाग केला आहे. त्याने महिलेचा हात तोंडात धरला आहे. महिला जोरजोरात ओरडताना दिसत आहे. दरम्यान घरमालक देखील तेथे येतो तिला कुत्र्‍याच्या तावडीतून सोडवण्याचा प्रयत्न करतो आहे. पण कुत्र्‍याच्या जबड्यातून तिचा हात सोडवू शकत नाही. दरम्यान महिला जमिनीवर पडते आणि स्वत:ला वाचवण्यासाठी ओरडते आहे. हे सर्व ऐकून तेथील लोक धावतात. मात्र तरीही कुत्रा महिलेचा हात सोडत नाही. बराच संघर्षानंतर कसा तरी महिलेचा हात कुत्र्‍याच्या जबड्यापासून वेगळा होतो.