Teacher Viral Video : मुख्याध्यापिकेचा माजुरडेपणा! शाळेत चिमुकल्यांकडून वर्गातच दाबून घेतले पाय, व्हिडिओ व्हायरल

शिक्षक हे विद्यार्थ्यांसाठी गुरु समान असतात. या गुरूंच्या आज्ञेचं पालन करणं हे प्रत्येक विद्यार्थ्यांचं कर्तव्य आहे. मात्र तामिळनाडू मधील मुखाध्यापिकेने हद्दच पार केली आहे. मुख्याध्यापिकेने वर्गातील एका बेंचवर झोपून विद्यार्थ्यांना पाय दाबण्यास सांगितल्याची व्हिडिओ सोशल मीडियावर व्हायरल होत आहे. या घटनेने प्रशासन खडबडून जागे झाले आहे.

व्हिडिओमधील चित्रीकरणानुसार, तामिळनाडूमधील हारूर येथील मावेरीपट्टी प्राथमिक शाळेत ३० विद्यार्थी शिकतात. एका वर्गात शिकवणी सुरु असताना शाळेच्या मुख्याध्यापिका कलैवनी मुलांच्या बेंचवर झोप काढताना दिसत आहेत. धक्कदायक गोष्ट म्हणजे मुख्याध्यापिका स्वतः झोपलेल्या असताना विद्यार्थ्यांना मात्र पाय दाबण्याचे आदेश दिले. असा व्हिडिओ सोशल मीडियावर व्हायरल झाला आहे. हा प्रकार त्यांच्याच घडल्याने पालक आणि स्थानिक नागरिकांमध्ये संतापाची लाट पसरली आहे.

सोशल मीडियावर हा व्हिडिओ मोठ्या प्रमाणावर पसरल्यानंतर जिल्हा शिक्षण अधिकाऱ्यांनी तातडीने शाळेला भेट दिली. प्राथमिक चौकशी सुरू झाली असून याबाबत संपूर्ण अहवाल मिळाल्यानंतर पुढील कारवाई होणार असल्याची माहिती प्रशासनाने दिली आहे. स्थानिक पालकांनीही मुख्याध्यापिकेविरुद्ध कठोर कारवाई करण्याची मागणी केली आहे.

गेल्या काही काळापासून शाळांमधील शिक्षकांकडून विद्यार्थ्यांवर होणारे अन्यायकारक वर्तन सतत चर्चेत येत आहे. अलीकडेच केरळमधील कासारगोड येथे सरकारी शाळेत मुख्याध्यापकांनी दहावीच्या विद्यार्थ्याला मारहाण केली होती. या घटनेत विद्यार्थ्याच्या कानाचा पडदा फुटला होता. ती घटना ११ ऑगस्ट रोजी कुंदमकुझी सरकारी उच्च माध्यमिक शाळेत घडली होती. याबाबत राज्य शिक्षण विभागाने चौकशीचे आदेश दिले आहेत.

तसेच केरळमधील आणखी एका धक्कादायक घटनेत, थ्रिक्काकारा येथील कोचीन पब्लिक स्कूलमध्ये पाचवीच्या विद्यार्थ्याला केवळ काही मिनिटे उशिरा शाळेत आल्याबद्दल शिक्षा करण्यात आली. प्रथम त्याला मैदानाभोवती दोन फेऱ्या धावण्यास भाग पाडण्यात आले, त्यानंतर त्याला एका अंधाऱ्या खोलीत एकटे कोंडण्यात आले. या घटनेनंतर केरळचे शिक्षण मंत्री व्ही. शिवनकुट्टी यांनी संचालकांना तातडीने चौकशी करण्याचे निर्देश दिले.

विद्यार्थ्यांना शिक्षणाबरोबरच सुरक्षित वातावरण देणे ही शिक्षकांची प्राथमिक जबाबदारी मानली जाते. मात्र अशा प्रकारच्या घटनांमुळे शाळांची प्रतिमा मलिन होत असून पालकांमध्ये असुरक्षिततेची भावना वाढते.