गुजरातमध्ये एक धक्कादायक घटना घडली आहे. कॉलेजच्या विद्यार्थ्यांनी वसतिगृहामध्ये एका तरूणाला बेदम मारहाण केली. तीन ते चार तरूणांनी मिळून एका तरूणाला मारलं. सोशल मीडियावर या घटनेचा व्हिडीओ व्हायरल झाल्यानंतर कुटुंबियांना या घटनेची माहिती झाली. व्हिडीओ पाहताच तरुणाच्या कुटुंबीयांना धक्का बसला. त्यांनी तात्काळ पोलिस ठाण्यामध्ये धाव घेत तक्रार दाखल केली. या प्रकरणी मारहाण करणाऱ्या तरुणांविरोधात गुन्हा दाखल करण्यात आला आहे. पोलिस सध्या तपास करत आहेत.

मिळालेल्या माहितीनुसार, गुजरातमधील जुनागढ येथे ही घटना घडली. अल्फा इंटरनॅशनल स्कूलमध्ये शिकत असलेले विद्यार्थी एका वसतिगृहात राहत होते. ११ वी, १२ वीच्या वर्गात हे तरूण शिकत आहेत. वसतिगृहातील त्यांच्या रुममध्ये ते खेळत बसले होते. खेळ सुरू असताना या विद्यार्थ्यांमध्ये वाद झाला. सुरूवातीला शा‍ब्दिक बाचाबाची झाली. त्यानंतर हा वाद इतका विकोपाला गेला की तीन ते चार तरुणांनी मिळून एका विद्यार्थ्यांला बेदम मारहाण केली.

सोशल मीडियावर व्हायरल झालेल्या या व्हिडीओमुळे कुटुंबियांना ही घटना समजली. यानंतर कुटुंबियांनी वसतिगृह आणि कॉलेज प्रशासनाला जबाबदार धरत पोलिसात तक्रार दाखल केली. कुटुबियांनी वसतिगृह आणि शाळा प्रशासनाकडून निष्काळजीपणा होत असल्याचा आरोप केला आहे. या घटनेचा व्हिडीओ व्हायरल झाल्यानंतर खळबळ उडाली आहे.

पोलिसांनी सांगितले की, अल्फा इंटरनॅशनल स्कूलने स्पष्ट केले की, ही घटना शाळेच्या जागेवर नाही तर खासगी वसतिगृहात घडली. याची जबाबदारी पूर्णपणे वसतिगृह मालकाची आहे. त्यानंतर वसतिगृह व्यवस्थापनाने संबंधित विद्यार्थ्यांविरोधात कारवाई करत त्यांना वसतिगृहातून बाहेर काढण्याचा निर्णय घेतला आहे. या सर्व घटनेची माहिती पोलिसांना आणि कुटुंबियांना देण्यात आली आहे.