Raipur News: छत्तीसगडच्या पेंड्रा जिल्ह्यातून एक व्हिडिओ व्हायरल झाला आहे. छत्तीसगडमध्ये एक प्रियकर आणि प्रेयसी हायटेन्शन टॉवरवर चढल्याची घटना घडली आहे. दोघे हायटेन्शन टॉवरवर चढल्यानंतर परिसरात एकच खळबळ उडाली आहे. (Latest Marathi News)

छत्तीसगडच्या पेंड्रा जिल्ह्यातील कोडगार गावातील ही घटना आहे. प्रियकर आणि प्रेयसीमध्ये किरकोळ गोष्टीवरून कडाक्याचे भांडण झालं, त्यानंतर प्रेयसी हायटेन्शन टॉवरवर चढली. नाराज झालेल्या प्रेयसीला मनवण्यासाठी प्रियकरही हायटेन्शन टॉवरवर चढला. यानंतर गावात एकच खळबळ उडाली. यामुळे गावकऱ्यांनी क्षणाचा विलंब न करता पोलिसांना माहिती दिली.

दोघे खाली उतरल्यानंतर पोलिसांनी त्यांना चौकशीसाठी पोलीस ठाण्यात घेऊन गेले. या दोघांच्या कृत्याची जोरदार चर्चा सुरू आहे.

नेमकं काय घडलं?

पेंड्रा पोलीस ठाण्याच्या कोडगार गावात प्रियकर आणि प्रेयसीमध्ये किरकोळ कारणावरून भांडणे झाले. यानंतर प्रेयसी अनिता ही नाराज होऊन घरी गेली. त्यानंतर घराजवळील हायटेन्शन टॉवरवर चढली. त्यावेळी गावकऱ्यांची नजर तरुणीवर गेली. त्यानंतर तिला खाली उतरण्यास सांगितलं. तरुणी हायटेन्शन टॉवरवर चढल्यानंतर गावातील अनेक लोक जमा झाले.

प्रियकराने काढली तरुणीची समजूत

तरुणीचा प्रियकर मुकेश देखील तिला समजविण्यासाठी टॉवरवर चढला होता. प्रियकराने बराच वेळ समजूत काढण्याचा प्रयत्न केला. त्यानंतर हे दोघे खाली उतरले. यावेळी उपस्थित पोलिसांनी दोघांना ताब्यात घेऊन चौकशीसाठी पोलीस स्टेशनला नेले. तत्पूर्वी, पेंड्रा गावातील पोलिसांनी या दोघांची समजूत काढून सोडून दिले. दोघांमध्ये किरकोळ गोष्टीवरून वाद झाल्यानंतर दोघे टॉवर चढले होते.