वैभववाडी शहरातील बसस्थानकासमोर नगरसेवकाच्या दुचाकीला कारची धडक बसल्यामुळे जोरदार राडा झाला. कोल्हापूर येथील काही तरूण कणकवलीच्या दिशेने जात होते. यावेळी वैभववाडी बसस्थानक परिसरात त्यांच्या कारची धडक एका मोटर सायकलला बसली. याची विचारणा केल्यानंतर कारमधील युवकांनी उध्दट बोलण्यास सुरूवात केली. यावरून नगरसेवक व त्या युवकांमध्ये शाब्दीक बाचाबाची सुरू झाली.

एकमेकांत सुरू असलेली शाब्दिक बाचाबाची हातघाईवर पोहचली. कार मधील एकाने थेट नगरसेवकाच्या शर्टाला हात घातला. हा प्रकार सुरू असताना नगरसेवकाच्या समर्थक आणि स्थानिकांनी त्या युवकांना चोप दिला. रस्त्यांच्या मधोमध गाडी उभी असल्यामुळे आणि शेकडोची गर्दी जमा झाल्यामुळे यावेळी रस्त्याच्या दुतर्फा वाहनांच्या रांगा लागल्या होत्या. यावेळी घटनास्थळावर पोलीस आणि लोकप्रतिनिधी दाखल झाल्यानंतर हा वाद(Fight) मिटवण्यात आला. काल संध्याकाळी झालेल्या घटनेची मात्र शहरात जोरदार चर्चा सुरू होती.

व्हायरल होत असलेल्या व्हिडिओत स्पष्टपणे घडलेला संपूर्ण प्रकार दिसून येत आहे. ज्यात काहीजण तरुणाला गाडीच्या बाहेर काढतात आणि भररस्त्यात मारण्यास सुरुवात करतात. संपूर्ण घटना बसस्थानकावर घडलेली असल्याने प्रवाशांची मोठी गर्दी सर्व घटना पाहण्यासाठी झाली होती. त्यातील एका प्रवाशाने सर्व घटलेला प्रकार मोबाईलमध्ये कैद केला आहे.

बस स्थानकातील घटना वाऱ्याच्या वेगाने सोशल मीडियावर व्हायरल(Viral) झालेली आहे आणि त्यानंतर फेसबूक, एक्स(ट्वीटर) आणि इन्स्टाग्राम अशा सोशल मीडिया प्लॅटफॉर्मवरही व्हायरल झालेली आहे. हाणामारीचा हा व्हिडिओ पाहिल्यानंतर अनेक प्रतिक्रिया नेटकरी वर्गातून उमटल्या आहेत.

टीप: हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.