राजस्थानमधील जयपूरमधील लग्नसमारंभात झालेल्या चोरीचा एक धक्कादायक प्रकार समोर आला आहे. या लग्नातील एक व्हिडीओ समोर आला असून तो सध्या सोशल मीडियावर चांगलाच व्हायरल होतोय. लग्नाच्या रिसेप्शनदरम्यान एक व्यक्ती पाहुणा असल्याचं दाखवत थेट स्टेजवर पोहोचते आणि नवरीचा दागिने आणि पैशांची भरलेली बॅग लंपास करून पळून जाते. ही संपूर्ण घटना सीसीटीव्हीत कैद झाली असून पोलिसांनी तपास सुरू केलाय़.

कधी घडला हा प्रकार?

हा प्रकार ७ फेब्रुवारी रोजी घडल्याचं म्हटलं जातंय. जगतपुरा परिसरातील एका लग्न समारंभ हॉलमध्ये रिसेप्शन सुरू होतं. स्टेजवर नवरा-नवरी उभे होते आणि पाहुण्यांसोबत फोटोसेशन सुरू होतं. याच गडबडीत सर्वांचं लक्ष कॅमेऱ्याकडे असताना एक व्यक्ती शांतपणे स्टेजच्या मागील बाजूने पुढे येताना दिसतेय.

व्हायरल व्हिडीओमध्ये तुम्ही पाहू शकता की, स्टेजवरील सोफ्याच्या बाजूला नवरीची बॅग ठेवलेली असते. संबंधित व्यक्ती आजूबाजूला पाहत सहजपणे पुढे येते आणि बॅग उचलते. यावेळी तो कोणालाही संशय न येऊ देता तिथून निघून जातो. हा प्रकार इतक्या वेगात घडलाय की, स्टेजवर उपस्थित असलेल्या कुणाच्याही लक्षात आलं नाही.

मीडिया रिपोर्ट्सनुसार, चोरी झालेल्या बॅगमध्ये सुमारे चार लाख रुपयांची रोख रक्कम आणि मौल्यवान दागिने होते. कार्यक्रम संपल्यानंतर बॅग दिसत नसल्याचं लक्षात येताच लोकांनी सीसीटीव्ही फुटेज तपासलं आणि त्यातून चोरी उघडकीस आली. त्यानंतर हा व्हिडीओ सोशल मीडियावर शेअर करण्यात आलाय. त्यामुळे हा मोठ्या प्रमाणात व्हायरल झाला.

व्हिडीओ व्हायरल झाल्यानंतर युजर्सकडून विविध कमेंट्स केल्या जातायत. काहींनी लग्नसमारंभात सुरक्षा व्यवस्थेचा अभाव असल्याची टीका केलीये. तर काहींनी मजेशीर कमेंट्सही केल्या आहेत. एका युजरने म्हटलं की, म्हणूनच बॅग नातेवाईकांकडे द्यायची असते.

पोलिसांकडून तपास सुरु

दरम्यान, पोलिसांनी सीसीटीव्ही फुटेजच्या आधारे चोराचा शोध सुरू केलाय. व्हायरल व्हिडीओमुळे लग्नसमारंभात मौल्यवान वस्तू स्टेजवर न ठेवण्याचा इशारा दिला जात आहे.