Youth Drowns at Juhu Beach Mumbai : मुंबईतील जुहू बीचवर शनिवारी मोठी दुर्घटना घडली. फोटो काढण्यासाठी गेलेल्या तरूणाचा समुद्रात बुडून मृत्यू झाला आहे. शनिवारी संध्याकाळी 5:45 वाजता ही दुर्दैवी घटना घडली. हा युवक मित्रांसह समुद्रकिनारी फोटो काढत असताना त्याचा तोल गेला आणि तो खोल पाण्यात बुडू लागला. त्याने आणि मित्रांनी आरडाओरड केल्याने तिथे उपस्थित जीवरक्षकांच्या लक्षात ही घटना आली. जीवरक्षकांनी तातडीने समुद्रात उडी घेतली आणि पोहत युवकापर्यंत पोहोचून त्याला बाहेर काढले. मात्र, नाकातोंडात पाणी गेल्याने त्याचा आधीच मृत्यू झाला होता. घटनेनंतर स्थानिक कोळी बांधव, जुहू पोलीस आणि अग्निशामक दल घटनास्थळी दाखल झाले. या पावसाळ्यातील ही पहिलीच दुर्घटना आहे. पोलिसांनी नागरिकांना समुद्रात खोलवर जाण्यास मज्जाव केला आहे आणि सुरक्षिततेच्या दृष्टीने सतर्क राहण्याचे आवाहन केले आहे.