आज २६ जानेवारी रोजी प्रजासत्ताक दिनी अमरावती जिल्हाधिकारी कार्यालयासमोर एका धुनी भांडी करणाऱ्या महिलेने अंगावर पेट्रोल ओतून आत्मदहनाचा प्रयत्न केल्याची खळबळजनक घटना घडली. मात्र गाडगे नगर पोलिसांच्या वेळीच हस्तक्षेपामुळे मोठी दुर्घटना टळली. उषा गोंडाने असे संबंधित महिलेचे नाव असून आर्थिक फसवणूक झाल्याचा आरोप करत न्याय न मिळाल्याने त्यांनी हे टोकाचे पाऊल उचलण्याचा प्रयत्न केल्याचे सांगण्यात येते. नोकरीचे आमिष देतो असे सांगून चार लाख 65 हजार रुपये एवढी रक्कम ठाकुर कुटुंबीयांनी माझ्याकडून घेतली. मी हे सर्व पैसे भांडी करून गोळा केले.

मात्र अजून पर्यंत नोकरी मिळाली नाही आणि माझे पैसे मिळाले नाही. त्यामुळे मी आतपर्यंतचा निर्णय घेतला होता असा आरोप यावेळी महिलेनी केला. घटनेपूर्वी त्यांनी पत्रकार परिषदेतून आत्मदहनाचा इशाराही दिला होता. प्रकार लक्षात येताच पोलिसांनी तत्काळ धाव घेत परिस्थिती नियंत्रणात आणली. संबंधित महिलेला पुढील चौकशीसाठी फ्रेजरपूरा पोलिसांच्या ताब्यात देण्यात आले असून घटनेनंतर जिल्हाधिकारी कार्यालय परिसरात काही काळ तणावाचे वातावरण होते.