मुंबईत महापौरपदावरून रस्सीखेच सुरू असताना, ठाण्यातही महापौरपदावरून भाजप - शिंदेसेना युती तुटण्याची शक्यता निर्माण झाली आहे. ठाण्याचं महापौरपद हे भाजपला देण्यात यावं, अशी मागणी आमदार निरंजन डावखरे यांनी केली आहे. महत्वाची पदे मिळाली नाहीत, तर विरोधी बाकावर बसू, असा इशारा त्यांनी दिला आहे.

आमचा स्ट्राइक रेट १०० टक्के राहिला आहे. भाजपच्या कार्यकर्त्यांनी प्रचंड मेहनत केली आहे. आमच्या जाहीरनाम्यात दिलेले आश्वासन पूर्ण करायचे असतील तर, महापालिकेत महत्वाची पदे आहेत, ती गरजेची आहेत. महापौरपद, सभागृह नेता, स्थायी समिती या सगळ्यांमध्ये पदे मिळावीत, अशी मागणी डावखरे यांनी केली.

प्रत्येक पक्षाच्या नेत्याला वाटतं की आमचा महापौर असावा. त्यामुळे भाजप नेत्यांना वाटत असेल. तर त्यात चूक काय आहे. आम्हालाही वाटतं की सर्व ठिकाणी आमचा महापौर असावा. पण ते शक्य आहे का? शेवटी निवडून आलेल्या नगरसेवकांच्या संख्येवर महापौर ठरतो. तसेच पक्षाचे नेते आहेत ते निर्णय घेतात त्यावर महापौर ठरतो. देवेंद्र फडणवीस आणि एकनाथ शिंदे जो निर्णय घेतील, तो आम्हाला मान्य आहे, अशी भूमिका शिंदेसेनेचे खासदार नरेश म्हस्के यांनी ठामपणे मांडली.