वर्धा-हिंगणघाट मार्गावर धोत्रा चौरस्ता येथे शनिवारी सकाळच्या सुमारास एस. टी. बस आणि ट्रेलरमध्ये भीषण अपघात झाला. या धडकेत बस चालक गंभीर जखमी झाला असून, एकूण १० ते १२ प्रवासी जखमी झाले आहेत. मिळालेल्या माहितीनुसार, वर्धेहून हिंगणघाटकडे जाणारी एस. टी. बस धोत्रा चौरस्त्यावर येत असताना, पेट्रोलपंपावरून डिझेल भरून निघालेल्या ट्रेलरने रस्ता ओलांडण्याचा प्रयत्न केला. मात्र, तो रस्ता न पाहता अचानकपणे ओलांडत असल्याने बसची ट्रेलरला जोरदार धडक बसली. या अपघातात बस चालक गंभीर जखमी झाला असून, इतर जखमी प्रवाशांना पोलिस व स्थानिक नागरिकांच्या मदतीने तत्काळ वर्ध्याच्या सेवाग्राम रुग्णालयात हलविण्यात आले. या दुर्घटनेमुळे काही वेळ मार्गावरील वाहतूक ठप्प झाली होती. मात्र, अल्लीपूर पोलीस निरीक्षक विजय घुले यांनी तातडीने घटनास्थळी पोहचून वाहतूक सुरळीत करण्याची कार्यवाही केली. स्थानिक पातळीवर अपघाताच्या घटनेने खळबळ उडाली असून, या प्रकरणाचा अधिक तपास पोलीस करत आहेत.