पुणे: वैष्णवी हगवणे मृत्यू प्रकरणात मुख्य आरोपी राजेंद्र हगवणेला फरार असताना आसरा व मदत करणाऱ्या पाच जणांविरुद्ध बावधन पोलिसांनी कारवाई करत गुन्हा दाखल केला असून, त्यांना अटक करण्यात आली आहे.

ज्यांनी आरोपीला आसरा दिला त्यामध्ये माजी ऊर्जा मंत्री वीर कुमार पाटील (कर्नाटक) यांचा मुलगा प्रीतम पाटील, मावळमधील फार्महाऊस मालक बंडू फाटक, साताऱ्यातील पुसेगाव येथील राहुल जाधव व अमोल जाधव, तसेच तळेगाव दाभाडे येथील मोहन भेगडे यांचा समावेश आहे.

पोलिस तपासानुसार, आरोपी राजेंद्र हगवणे याने फरार राहण्यासाठी विविध ठिकाणी आसरा घेतला होता. या सर्व पाच व्यक्तींनी त्याला मदत केल्याचे निष्पन्न झाल्यानंतर बावधन पोलिसांनी त्यांच्या विरोधात गुन्हा दाखल करून त्वरित अटक केली.

पोलिसांकडून याप्रकरणी पुढील तपास सुरू असून, आणखी कोणी मदत केली का, याचीही चौकशी केली जात आहे.