सूरतमध्ये सुरू असलेल्या मुसळधार पावसाने जनजीवन विस्कळीत झालं आहे. अनेक भागांत चार ते पाच फूटांपर्यंत पाणी साचल्याने रहदारी आणि आपत्कालीन सेवांवर मोठा परिणाम झाला आहे. अशातच एका रुग्णाची प्रकृती खालावल्याने त्याला रुग्णालयात नेण्याची परिस्थिती निर्माण झाली. मात्र पाण्यानी तुडूंब भरलेल्या रस्त्यांमुळे रुग्णवाहिका रुग्णाच्या घरापर्यंत पोहोचू शकली नाही.

यामुळे परिसरातील नागरिकांनी पुढाकार घेत रुग्णाला स्ट्रेचरवर ठेवून त्या पाण्यातून चालत रुग्णवाहिकेपर्यंत नेलं. या घटनेमुळे नागरिकांच्या माणुसकीचे दर्शन घडले असले तरी, पुराच्या पाण्यात अडकलेल्या शहर व्यवस्था आणि आपत्कालीन सेवेची अडचण पुन्हा एकदा समोर आली आहे. प्रशासनाकडून अद्याप पाण्याच्या निचऱ्यासाठी प्रयत्न सुरू आहेत. तोपर्यंत नागरिकांनी घराबाहेर न पडण्याचे आवाहन प्रशासनाकडून करण्यात आले आहे.