नवी मुंबई आणि मुंबईत आज दुपारी अचानकपणे जोरदार पावसाला सुरुवात झाली. या पावसामुळे नागरिकांची तारांबळ उडाली. गेल्या दोन दिवसांपासून मुंबई आणि उपनगरांमध्ये मुसळधार पाऊस कोसळत आहे. अनेक ठिकाणी पूरसदृश्य परिस्थिति निर्माण झाली होती. यामुळे जनजीवन विस्कळीत झाले होते.

बेलापूर परिसरात अचानक धुके दाटून आले आणि काही क्षणांतच मुसळधार पावसाला सुरुवात झाली. बेलापूरचे सह्याद्रीच्या नजीकचे भौगोलिक स्थान याला कारणीभूत ठरत असल्याचे हवामान खात्याचा प्राथमिक अंदाज आहेत.

मुंबई पोलिसांनी खबरदारीचा उपाय म्हणून समुद्र किनाऱ्यांवर जाणाऱ्या नागरिकांना थांबवले आहे. याचबरोबर मध्य रेल्वेची वाहतूकही विस्कळीत होण्याची शक्यता वर्तवण्यात येत आहे.

हवामान खात्याने पुढील काही तास मुसळधार पावसाचा इशारा दिला आहे. यामुळे मुंबई पुन्हा एकदा तुंबण्याची शक्यता आहे. प्रशासन सज्ज असून नागरिकांनी आवश्यक खबरदारी घ्यावी, असा सल्ला देण्यात आला आहे.